ព័ត៌មានកីឡាអន្តរជាតិ
(English)
កៅអីតំណែងគ្រូបង្វឹករបស់លោក Xabi Alonso នៅឯ Real Madrid ហាក់បីជាកាត់បន្ថយកម្តៅបន្តិចវិញហើយ បន្ទាប់ពីក្រុមបានយកឈ្នះលើ Alaves ដោយបញ្ចប់លទ្ធផល ១-២ កាលពីរាត្រីថ្ងៃអាទិត្យទី ១៥ ខែធ្នូ ឆ្នាំ២០២៥។
មែនទែនទៅ ក្លិប Real Madrid បម្រុងតែបណ្តេញលោក Xabi Alonso ចេញពីតំណែងហើយ បន្ទាប់ពីការដឹកនាំរបស់លោកហាក់បីជាមិនបានលទ្ធផលទ្បើយ ក្នុងប៉ុន្មានប្រកួតចុងក្រោយមិនថានៅ La Liga និង UEFA Champions League នោះទេ។ ហើយកាលពីថ្ងៃព្រហស្បតិ៍ទី១១ ខែធ្នូ ឆ្នាំ២០២៥ កន្លងទៅថ្មីៗនេះក៏មានសេចក្តីរាយការណ៍ពី Diario AS បញ្ជាក់ថា៖ លោក Xabi Alonso នឹងបណ្តេញចេញពីតំណែង ប្រសិនបើមិនអាចដឹកនាំក្រុមឈ្នះក្នុងការប្រកួតខាងលើ។
ជ័យជម្នះខាងលើនេះក៏បានធ្វើឱ្យពួកគេនៅគម្លាតពី FC Barcelona ដែលជាក្រុមកំពុងកាន់កាប់កំពូលតារាងពិន្ទុ La Liga ចំនួន ៤ ពិន្ទុផងដែរ បន្ទាប់ពីលេង ១៧ ប្រកួតដូចគ្នា។ យ៉ាងណា ប្រសិនបើលោក Xabi Alonso នៅដឹកនាំក្រុមមិនទទួលបានលទ្ធផលល្អ ក៏ក្លិបនឹងពិរណាបណ្តេញចេញដដែល ខណៈដែលក្លិប Real Madrid ក៏បានសម្លឹងមើលឃើញលោក Alvaro Arbeloa ជាអ្នកជំនួសតំណែងនេះផងដែរ។
សូមជម្រាបថា នៅថ្ងៃពុធទី១៧ ខែធ្នូ ឆ្នាំ២០២៥ ខាងមុខនេះ Real Madrid នឹងត្រូវប៉ះគ្នាជាមួយ Talavera ដែលជាក្រុមមកពីលីគទី ៣ របស់ប្រទេសអេស្ប៉ាញ ក្នុងពានរង្វាន់ Copa del Rey៕
ប្រភព៖ nytimes
(English) Jamie Vardy បានឈ្នះពានរង្វាន់កីឡាករឆ្នើមប្រចាំខែវិច្ឆិកា នៅក្នុងក្របខ័ណ្ឌបាល់ទាត់អ៊ីតាលី Serie A បន្ទាប់ពីបង្ហាញទម្រង់លេងដ៏គួរឱ្យចាប់អារម្មណ៍ជាបន្តបន្ទាប់ជាមួយក្លិប Cremonese។ កីឡាករវ័យ ៣៨ ឆ្នាំ បានចូលរួមជាមួយក្រុមអ៊ីតាលីកាលពីរដូវក្តៅនេះ ក្នុងនាមជាកីឡាករគ្មានភ្នាក់ងារ បន្ទាប់ពីបញ្ចប់រយៈពេល ១៣ ឆ្នាំដ៏ជោគជ័យជាមួយក្រុម Leicester City។
ឥឡូវនេះគាត់បានក្លាយជាកីឡាករអង់គ្លេសដំបូងគេដែលទទួលបានពានរង្វាន់កីឡាករឆ្នើមប្រចាំខែនៅក្នុងប្រទេសអ៊ីតាលី ដោយបានយកឈ្នះលើកីឡាករដូចជា Paul Gascoigne, David Beckham និង Paul Ince។ ពានរង្វាន់នេះត្រូវបានបោះឆ្នោតដោយអ្នកគាំទ្ររួមជាមួយនឹងទិន្នន័យស្ថិតិ ដែល Vardy បានយកឈ្នះ Mike Maignan របស់ក្រុម AC Milan, Lautaro Martinez របស់ក្រុម Inter Milan, David Neres របស់ក្រុម Napoli, Leo Ostigard របស់ក្រុម Genoa និង Nicolo Zaniolo របស់ក្រុម Udinese។
លោក Luigi De Siervo នាយកប្រតិបត្តិនៃ Serie A បាននិយាយនៅលើគេហទំព័រ legaseriea.it ថា Jamie Vardy ពិតជាកីឡាករមកពីសម័យកាលមួយផ្សេងទៀត។ទេពកោសល្យម្នាក់ក្នុងចំណោមទេពកោសល្យទាំងនោះ ដែលជាមួយនឹងប្រវត្តិ សមិទ្ធផល និងស្មារតីដ៏រឹងមាំដែលពួកគេរស់នៅជាមួយរាល់ការប្រកួត បង្ហាញបានល្អបំផុតនូវមនោសញ្ចេតនានៃបាល់ទាត់៕
ប្រភព៖ BBC
(English) អ្នកគាំទ្របាល់ទាត់បានចោទប្រកាន់ FIFA ពីបទ ក្បត់ទំនុកចិត្តដ៏ធំសម្បើមបន្ទាប់ពីតម្លៃសំបុត្រចូលទស្សនាការប្រកួតបាល់ទាត់ពិភពលោក ២០២៦ ដែលបានបើកលក់ចុងក្រោយបំផុត កាលពីថ្ងៃព្រហស្បតិ៍ទី ១១ ខែធ្នូ មានតម្លៃខ្ពស់កប់ពពក។ ស្ថាប័នគ្រប់គ្រងបាល់ទាត់បានបែងចែកសំបុត្រ៨ភាគរយទៅឱ្យសមាគមបាល់ទាត់របស់ប្រទេសនីមួយៗដែលមានកៅអីប្រកួតពានរង្វាន់បាល់ទាត់ពិភពលោកដើម្បីលក់ទៅឱ្យអ្នកគាំទ្រស្មោះត្រង់បំផុត។
អង្គការអ្នកគាំទ្របាល់ទាត់អឺរ៉ុប Football Supporters Europe (FSE) បានពណ៌នាអំពីតម្លៃបច្ចុប្បន្នថាថ្លៃហួសហេតុពេក។ អង្គការនេះបាននិយាយនៅក្នុងសេចក្តីថ្លែងការណ៍មួយថា នេះគឺជាការក្បត់ដ៏ធំសម្បើមនៃប្រពៃណីព្រឹត្តិការណ៍បាល់ទាត់ពិភពលោក ដោយមិនអើពើពីការចូលរួមចំណែករបស់អ្នកគាំទ្រចំពោះការប្រកួតបាល់ទាត់ដ៏គួរឱ្យចាប់អារម្មណ៍នោះទេ។ ចំណែកឯសមាគមបាល់ទាត់អង់គ្លេសបានចែករំលែកព័ត៌មានអំពីតម្លៃសំបុត កាលពីល្ងាចថ្ងៃព្រហស្បតិ៍ ដែលបង្ហាញថា ប្រសិនបើអ្នកគាំទ្រម្នាក់ទិញសំបុត្រសម្រាប់រាល់ការប្រកួតពីវគ្គចែកពូលរហូតដល់វគ្គផ្តាច់ព្រ័ត្រ វានឹងមានតម្លៃជាង៧០០០ដុល្លារអាមេរិក។ សមាគមអ្នកគាំទ្របាល់ទាត់អង់គ្លេសបាននិយាយថាតម្លៃនេះវាគឺជាការទះកំផ្លៀងអ្នកគាំទ្រ។
ជាមួយគ្នានេះដែរ នៅក្នុងបញ្ជីមួយដែលចេញផ្សាយដោយសហព័ន្ធបាល់ទាត់អាល្លឺម៉ង់បានបង្ហាញថា តម្លៃសំបុត្រមានចាប់ពី១៨០ដុល្លារអាមេរិក ដល់៧០០ ដុល្លារអាមេរិក សម្រាប់ការប្រកួតវគ្គចែកពូល។ តម្លៃទាបបំផុតសម្រាប់វគ្គផ្តាច់ព្រ័ត្រនៅរដ្ឋ New Jersey គឺ៤១៨៥ដុល្លារអាមេរិក ហើយតម្លៃខ្ពស់បំផុតគឺ៨៦៨០ដុល្លារអាមេរិក។សំបុត្រតម្លៃទាបបំផុត សម្រាប់ការប្រកួតបើកឆាកក្នុងពូលរបស់ក្រុមអាល្លឺម៉ង់ទល់នឹងក្រុម Curacao ក្នុងទីក្រុង Houstonគឺ ១៨០ ដុល្លារអាមេរិក។ តម្លៃទាបបំផុតសម្រាប់វគ្គពាក់កណ្តាលផ្តាច់ព្រ័ត្រគឺ ៩២០ ដុល្លារអាមេរិក ដែលកើនឡើងដល់ ១១២៥ ដុល្លារអាមេរិក៕
(English) ទោះបីជាដឹកនាំ Man City ឈ្នះក្នុងផ្ទះ Real Madrid ដោយលទ្ធផល ២-១ និងនាំក្លិបមកឈរលំដាប់កំពូលតារាងទាំង ៤ ក៏ដោយ លោក Pep Guardiola បាននិយាយថាក្រុមរបស់លោកនៅឆ្ងាយពីការឈ្នះពានរង្វាន់ UEFA Champions League ។ លទ្ធផលនេះបានធ្វើឲ្យក្រុមរបស់លោក Guardiola ក្លាយជាក្រុមដែលមានភាគរយខ្ពស់ក្នុងការភ្នាល់ឈ្នះពានតាមពីក្រោយ ក្រុមArsenal និង Bayern Munich។
លោក Guardiola បានថ្លែងប្រាប់ទូរទស្សន៍ TNT Sports ថា៖ «យើងនៅឆ្ងាយណាស់»។ យ៉ាងណាក៏ដោយ យើងមិនទាន់ត្រៀមខ្លួនរួចរាល់នៅឡើយទេ។ នៅក្នុងខែកុម្ភៈ យើងនឹងកាន់តែប្រសើរឡើង។ យើងធ្លាប់នៅទីនេះពីមុនមក លេងបានល្អច្រើនជាងថ្ងៃនេះ តែយើងនៅតែចាញ់។ ពេលខ្លះនោះវាជាបាល់ទាត់។កីឡាករបានខិតខំប្រឹងប្រែងយ៉ាងខ្លាំង វាជាលទ្ធផលដ៏ល្អឥតខ្ចោះ ស្មារតីក៏មិនគួរឲ្យជឿ ប៉ុន្តែនៅមានគម្លាតដែលត្រូវកែលម្អ។ គាត់បានបន្ថែមថា វាអាចប្រសើរជាងនេះ។ ជាការពិតណាស់ ការឈ្នះនៅ Bernabeu គឺពិបាកណាស់។ កីឡាករបួន ប្រាំ ប្រាំមួយនាក់បានលេងការប្រកួតដំបូងរបស់ពួកគេនៅទីនេះ ដូច្នេះប្រហែលជាយើងមិនទាន់ត្រៀមខ្លួនរួចរាល់ទាំងស្រុងក្នុងការលេងក្នុងដំណាក់កាលទាំងនេះដូចដែលយើងមាននោះទេ ប៉ុន្តែវាជាដំណើរការមួយ ហើយមានកីឡាករថ្មីជាច្រើន៕
(English) លោក Patrick Berger បានរាយការណ៍ថាគ្រូបង្វឹក Xabi Alonso នឹងមិនត្រូវបានបណ្តេញចេញទេ ទោះបីជាក្រុមរបស់លោកចាញ់ Manchester City ២-១ នៅឯកីឡដ្ឋាន Bernabeu ក៏ដោយ។ ។ ការលើកឡើងបែបនេះក៏ដោយសារតែ មុនការប្រកួត មានលេចឭព័ត៌មានថា Real Madrid នឹងបណ្តេញអ្នកចាត់ការចេញ ប្រសិនបើពួកគេចាញ់ការប្រកួតជាមួយក្រុម Manchester City ។
ទោះជាយ៉ាងណាក៏ដោយក្រោយការប្រកួត ក្រុម Madrid បានវាយតម្លៃថា ការដឹកនាំរបស់លោក បានល្អគ្រប់គ្រាន់ ហើយវាគឺជាការបរាជ័យគួរឱ្យសោកស្តាយ។ Alonso នឹងនៅតែស្ថិតក្នុងការងាររបស់គាត់ ហើយត្រូវបានវាយតម្លៃបន្ទាប់ពីការប្រកួតទល់នឹងក្រុម Deportivo Alaves នៅចុងសប្តាហ៍នេះ។ យោងតាមសារព័ត៌មាន Diario AS ក្លិប Real Madrid បានពិចារណាទៅលើបេក្ខជនបីរូបគឺលោក Jurgen Klopp, Zinedine Zidane ឬ Jose Mourinho ប៉ុន្តែជម្រើសទាំងបីត្រូវបានច្រានចោលយ៉ាងឆាប់រហ័សដោយសារហេតុផលផ្សេងៗគ្នា៕
(English) បន្ទាប់ពីស៊ុតបាល់ពិន័យប៉េណាល់ទី បានមួយគ្រាប់ជួយឲ្យ Manchester City យកឈ្នះក្រុមយក្សអេស្ប៉ាញ Real Madrid ដោយលទ្ធផល ២-១ នៅក្នុងពហុកីឡដ្ឋាន Bernabeu កីឡាករសញ្ជាតិន័រវែស រូបនេះបានឈរកំពូលតារាងកីឡាកររកគ្រាប់បាល់បាន៥០គ្រាប់លឿនជាងគេនៅ Champions League។ នេះគឺជាគ្រាប់បាល់ទី៥១របស់ Haaland ក្នុងការបង្ហាញខ្លួនត្រឹមតែ៥០ប្រកួតប៉ុណ្ណោះ។គ្រាប់បាល់ទី ៥១ របស់គាត់ បានមកពីការទាត់បាល់ពិន័យ បន្ទាប់ពីគាត់ត្រូវបាន Antonio Rudiger រារាំង។
កំណត់ត្រារបស់ Opta បានបញ្ជាក់ថានេះនេះគឺជាចំនួនគ្រាប់បាល់ច្រើនបំផុតក្នុង៥០ប្រកួតនៅក្នុងប្រវត្តិសាស្ត្រនៃបាល់ទាត់Champions League។ ចំណែកឯកីឡាករឈរលំដាប់ទីពីរគឺបានទៅលើអតីតតារាឆ្នើមរបស់ Manchester United គឺ Ruud van Nistelrooy ដែលស៊ុតបញ្ចូលទីបាន៤២ គ្រាប់ក្នុង៥០ប្រកួតដំបូង។ Filippo Inzaghi, Harry Kane និង Kylian Mbappe រកបាន៣៤គ្រាប់ស្មើគ្នាខណៈ Lionel Messi និង Robert Lewandowski រកបាន ៣៣ គ្រាប់ដូចគ្នាដែរ។ Karim Benzema និង Edinson Cavani រកបាន ៣១ គ្រាប់ម្នាក់ៗ ខណៈដែល Neymar រកបាន ៣០ គ្រាប់៕
(English) Paul Pogba បានវិនិយោគលើកីឡាប្រណាំងអូដ្ឋ Al Haboob ដែលមានមូលដ្ឋាននៅអារ៉ាប៊ីសាអូឌីត។ ក្រុម Al Haboob ដែលបង្កើតឡើងដោយសហគ្រិន Omar Almaeena និង Safwan Modir គឺជាក្រុមប្រណាំងអូដ្ឋទំនើបដំបូងគេរបស់ពិភពលោកដែលប្រកួតប្រជែងលើឆាកអន្តរជាតិ។
ខ្សែបម្រើក្រុម Monaco រូបនេះបានក្លាយជាម្ចាស់ភាគហ៊ុន និងជាឯកអគ្គរដ្ឋទូតសម្រាប់ក្រុម Al Haboob ដែលជាក្រុមប្រណាំងអូដ្ឋអាជីពដំបូងគេរបស់ពិភពលោក សម្រាប់ប្រកួតប្រជែងនៅទូទាំងអារ៉ាប់រួម និងបណ្តាប្រទេសឈូងសមុទ្រ។ Pogba បានប្រាប់ BBC Sport ថា “ខ្ញុំបានមើលការប្រណាំងអូដ្ឋរបស់ខ្ញុំនៅលើ YouTube ហើយបានចំណាយពេលធ្វើការស្រាវជ្រាវនៅពេលទំនេររបស់ខ្ញុំ ដើម្បីព្យាយាមយល់ពីបច្ចេកទេស និងយុទ្ធសាស្ត្រ។ នៅទីបញ្ចប់ កីឡាគឺជាកីឡា។ វាទាមទារបេះដូង ការលះបង់ និងការធ្វើការជាក្រុម។ ការប្រណាំងអូដ្ឋ គឺជាកីឡាប្រពៃណីមួយ ដែលមានប្រជាប្រិយភាពជាពិសេសនៅមជ្ឈិមបូព៌ា៕
(English) អង្គការតស៊ូមតិមិនស្វែងរកប្រាក់ចំណេញហៅកាត់ថា FairSquare បានដាក់ពាក្យបណ្តឹងជាផ្លូវការទៅគណៈកម្មាធិការសីលធម៌ឯករាជ្យរបស់ FIFA ប្រឆាំងនឹងលោក Gianni Infantino ពីបទរំលោភបំពានយ៉ាងធ្ងន់ធ្ងរ៤ករណី ទៅលើឯករាជ្យភាពរបស់ស្ថាប័នបាល់ទាត់ចំនួន៤ករណី។ បទចោទទាំង៤នោះរួមមានៈ អព្យាក្រឹតភាពនយោបាយតាមរយៈការគាំទ្រប្រធានាធិបតីអាមេរិកលោក Donald Trump ជាសាធារណៈម្តងហើយម្តងទៀត។ការបញ្ចុះបញ្ចូលឱ្យលោកដូណាល់ត្រាំ ឈ្នះរង្វាន់ណូបែលសន្តិភាព។ ការការពារតំណែងប្រធានាធិបតីនៅលើឆាកនៅទីក្រុង Miamiនិង ការសរសើរគោលនយោបាយការបរទេស ក្នុងអំឡុងពេលផ្តល់រង្វាន់សន្តិភាព FIFA ថ្មី និងបន្ទរពាក្យស្លោក “ធ្វើឱ្យអាមេរិកអស្ចារ្យម្តងទៀត”ជាដេីម។
ឯកសារចំនួនប្រាំបីទំព័រ ដែលបានទទួលបានដោយកាសែត The Athletic បានអះអាងថា សកម្មភាពរបស់លោក Infantino រំលោភលើមាត្រា១៥នៃក្រមសីលធម៌របស់ FIFA និងធ្វើឱ្យខូចកេរ្តិ៍ឈ្មោះរបស់ស្ថាប័នគ្រប់គ្រងបាល់ទាត់ពិភពលោក។ ពាក្យបណ្តឹងនេះក៏ទាមទារឱ្យមានការស៊ើបអង្កេតពេញលេញលើការបង្កើតពានរង្វាន់សន្តិភាព FIFA ដែលមិនច្បាស់លាស់ផងដែរ ដោយអះអាងថាការសម្រេចចិត្តប្រគល់រង្វាន់ដំបូងទៅឱ្យប្រធានាធិបតីអាមេរិកដែលកំពុងកាន់តំណែងដោយគ្មានការយល់ព្រមពីក្រុមប្រឹក្សា FIFA ឬលក្ខណៈវិនិច្ឆ័យដែលមានតម្លាភាព បានរំលោភលើច្បាប់ផ្ទៃក្នុង និងកាតព្វកិច្ចអព្យាក្រឹតភាពរបស់អង្គការ។
ជុំវិញនឹងបញ្ហានេះ FIFA បានបដិសេធមិនធ្វើអត្ថាធិប្បាយទេក៏ប៉ុន្តែក្នុងអំឡុងប្រគលពានរង្វានសន្តិភាពFIFA លោក ធ្លាប់បាននិយាយថា ពានរង្វាន់នេះបានទទួលស្គាល់ការប្តេជ្ញាចិត្តរបស់លោក Trump ក្នុងការ លើកកម្ពស់សន្តិភាព និងឯកភាពជុំវិញពិភពលោក៕
(English) លោក Gianni Infantino ប្រធាន FIFA បានសុំទោសគ្រូបង្វឹកក្រុមជាតិជម្រើសអាហ្សង់ទីនលោក Lionel Scaloni ពីបទបង្ខំឲ្យឱ្យលោកពាក់ស្រោមដៃមុននឹងប៉ះពានរង្វាន់ ក្នុងអំឡុងពេលចាប់ឆ្នោតព្រឹត្តិការណ៍ FIFA World Cup ឆ្នាំ២០២៦ កាលពីថ្ងៃសុក្រសប្តាហ៍មុន។ តាមច្បាប់របស់FIFA មិនតម្រូវឲ្យគ្រូបង្វឹកដឹកនាំឈ្នះ ជេីងឯកពាក់ស្រោមដៃទេ តែក្រៅពីនេះត្រូវពាក់ស្រោមដៃព័ណ៌ ស មុននឹងប៉ះវា។អ្នករៀបចំកម្មវិធី ហាក់ដូចជាមិនស្គាល់គ្រូបង្វឹកដែលឈ្នះពានរង្វាន់បាល់ទាត់ពិភពលោករូបនេះ។
លោក Scaloni ដែលមើលទៅហាក់ដូចជាមានការភ្ញាក់ផ្អើល បាននិយាយថា មន្ត្រីទាំងនោះមិនស្គាល់ថាខ្ញុំជានរណាទេ។ បន្ទាប់ពីមានការជជែកវែកញែកគ្នាតាមបណ្តាញសង្គម ម្ភៃបួនម៉ោងក្រោយមក នៅក្នុងព្រឹត្តិការណ៍មួយដើម្បីបញ្ជាក់ពីកាលវិភាគនៃការប្រកួត លោក Infantino បានធ្វើការកែតម្រូវវិញ។ លោកបានមានប្រសាសន៍ថា ខ្ញុំសូមអភ័យទោសក្នុងនាម FIFA។ ខ្ញុំមិនដឹងទេ ដោយហៅលោក Scaloni ឡើងលើឆាក ហើយប្រគល់ពានរង្វាន់ឱ្យគាត់។
លោក Infantino បានបន្តថា ជាការពិតណាស់ ជើងឯកពិភពលោកអាចប៉ះពានរង្វាន់បាន។ ខ្ញុំសូមអភ័យទោស ខ្ញុំមិនដឹងទេ។វាជារឿងដ៏គួរឱ្យស្អប់ខ្ពើមមួយ។ លោកបាននិយាយបែបកំប្លែងថា វាគ្រាន់តែថា នៅពេលដែលអ្នកជាជើងឯកពិភពលោក អ្នកមើលទៅក្មេងជាងវ័យជារៀងរាល់ថ្ងៃ។ ប្រទេសអាហ្សង់ទីននឹងបើកយុទ្ធនាការ World Cup ឆ្នាំ២០២៦ របស់ពួកគេនៅថ្ងៃទី១៦ ខែមិថុនា ទល់នឹងប្រទេសអាល់ហ្សេរី នៅទីក្រុង Kansas City។ បន្ទាប់មកពួកគេនឹងប្រឈមមុខនឹងប្រទេសអូទ្រីស និងប្រទេសហ្ស៊កដានី៕
ប្រភព៖ Reuters
