ព័ត៌មានកីឡាអន្តរជាតិ
(English) Cristian Romero ប្រធានក្រុមនិងខ្សែការពាររបស់ Tottenham Hotspur ត្រូវបានបោះឆ្នោតជ្រើសរើសជាប់ជាកីឡាករឆ្នើមរបស់ UEFA Europa League ប្រចាំឆ្នាំ២០២៤-២៥ ។ កីឡាករអាហ្សង់ទីនរូបនេះបានបង្ហាញខ្លួនក្នុងការប្រកួតពានរង្វាន់អឺរ៉ុបចំនួន៧ដងនិងមានសមត្ថភាពការពារបាល់ បានត្រឹមត្រូវ ៩០% បញ្ជូនបាល់បានត្រឹមត្រូវ៩១% និងការដណ្តីមបាល់ត្រឡប់មកវិញបាន៩០% ។
ការដឹកនាំរបស់គាត់គឺសំខាន់នៅក្នុងជ័យជម្នះចុងក្រោយរបស់ Tottenham ១-០ លើ Manchester United ក្នុងទីក្រុង Bilbao នៅថ្ងៃទី ២១ខែឧសភា ឆ្នាំ២០២៥ ដោយបញ្ចប់ភាពរាំងស្ងួតពានរង្វាន់រយៈពេល ១៧ ឆ្នាំរបស់ពួកគេ។ ទន្ទឹមនឹងនេះដែរ ខ្សែបម្រើក្រុម Lyon វ័យ២១ ឆ្នាំ Rayan Cherki ត្រូវបានជ្រើសរើសជាកីឡាករវ័យក្មេងល្អបំផុតរបស់ការប្រកួត ដោយស៊ុតបញ្ចូលទីបាន៤គ្រាប់ និងជួយមិត្តរួមក្រុមបាន៨ដងក្នុង១២ ប្រកួត។ កីឡាករដែលអ្នកឈ្នះពីមុនៗមករួមមានៈ -២០២៣-២៤ កីឡាករ Pierre-Emerick Aubameyang របស់ Marseille
-២០២២-២៣: កីឡាករ Jesús Navas ក្លិប Sevilla
-២០២១-២២៖ កីឡាករ Filip Kostić ក្លិប Frankfurt
-២០២០-២១: កីឡាករ Gerard Moreno ក្លិប Villarreal
-២០១៩-២០: កីឡាករ Romelu Lukaku ក្លិប Inter Milan
-២០១៨-១៩: កីឡាករ Eden Hazard ក្លិប Chelsea៕
(English) Crystal Palace បានលើកពានរង្វាន់ជាប្រវត្តិសាស្ត្រលើកដំបូង កាលពីថ្ងៃសៅរ៍ទី១៧ឧសភា បន្ទាប់ពីបានយកឈ្នះលើក្រុម Manchester City ក្នុងលទ្ធផល ១-០ ក្នុងការប្រកួតវគ្គផ្តាច់ព្រ័ត្រ FA Cup នៅឯកីឡដ្ឋាន Wemble ប៉ុន្តែក្លិបនេះ អាចគ្មានកៅអីប្រកួតពានរង្វាន់ Europa League។ ជាការពិតជ័យជម្នះនេះបានធ្វើឱ្យក្លិប Crystal Palace ទទួលបានកៅអីមួយទៅប្រកួតពានរង្វាន់ Europa League នៅរដូវកាលក្រោយ ខណៈដែលអ្នកឈ្នះពានរង្វាន់ FA Cup មានសិទ្ធិសម្រាប់ការប្រកួតកម្រិតទីពីររបស់ទ្វីបអឺរ៉ុបដោយស្វ័យប្រវត្តិ។
ទោះជាយ៉ាងណាក៏ដោយ ច្បាប់របស់ UEFA អាចបង្អាក់ក្តីសុបិនប្រកួតពានអឺរ៉ុបរបស់ពួកគេ។ ច្បាប់នេះបានហាមមិនឱ្យក្លិបបាល់ទាត់ ២ ដែលមានម្ចាស់តែមួយទៅប្រកួតពានអឺរ៉ុបទាំងពីរនោះទេ។ ក្តីបាម្ភនេះក៏ដោយសារតែលោក John Textor’s Eagle Football Group កាន់កាប់ភាគហ៊ុនក្លិបបាល់ទាត់ ២ គឺ Crystal Palace ចំនួន៤៣% និង Lyon (បារាំង) ៨៨% ។ បច្ចុប្បន្នLyon ស្ថិតក្នុងចំណាត់ថ្នាក់លេខ ៦ក្នុងតារាងបារាំង Ligue 1 ។ ក្រុមនេះកំពុងត្រៀមខ្លួនសម្រាប់ Europa Conference League ។ ទោះជាយ៉ាងណាក៏ដោយ ប្រសិនបើ Paris Saint-Germain ឈ្នះការប្រកួតវគ្គផ្តាច់ព្រ័ត្រ Coupe de France ទល់នឹង Reims នោះ Lyon អាចឡើងទៅកាន់ Europa League ។ សេណារីយ៉ូនេះធ្វើឱ្យ Palace ប្រឈមនឹងហានិភ័យ ដោយសារ UEFA អាចចាត់ទុកកម្មសិទ្ធិពីររបស់ Textor ជាការបំពានច្បាប់កម្មសិទ្ធិពហុក្លិបរបស់ពួកគេ៕
(English) កីឡាករ Luka Modric ប្រធានក្រុម Real Madrid បានប្រកាសថា គាត់នឹងចាកចេញពីក្លិបយក្ស អេស្ប៉ាញ បន្ទាប់ពីបញ្ចប់យុទ្ធនាការប្រកួតពានរង្វាន់ FIFA Club World Cup នៅសហរដ្ឋអាមេរិករដូវក្តៅនេះ។ ខ្សែបម្រើសញ្ជាតិក្រូអាស៊ី ដែលជាម្ចាស់ពានរង្វាន់ Ballon d’Or ឆ្នាំ២០១៨ នឹងចូលសមរភូមិវាលស្មៅចុងក្រោយក្នុងទឹកដីរបស់ខ្លួន នៅពេលដែលReal Madrid ស្វាគមន៍ក្រុម Real Sociedad នៅថ្ងៃសៅរ៍ក្នុងការប្រកួតបញ្ចប់រដូវកាល La Liga។
Modric បាននិយាយនៅលើ Instagram ថា ពេលវេលាបានមកដល់ហើយ។ ពេលវេលាដែលខ្ញុំមិនដែលខ្ញុំមិនចង់ឃើញ វាបានមកដល់ ប៉ុន្តែនោះគឺជាបាល់ទាត់ ហើយនៅក្នុងជីវិត អ្វីគ្រប់យ៉ាងមានការចាប់ផ្តើម និងចុងបញ្ចប់របស់វា។ ចាប់តាំងពីមករួមរស់ជាមួយក្រុម Real ពីក្លឹប Spurs ក្នុងឆ្នាំ ២០១២ Modric បានឈ្នះពានរង្វាន់ចំនួន២៨ រួមទាំងពានរង្វាន់ Champions League ចំនួន៦និងពានរង្វាន់ក្នុងស្រុកចំនួន៤ផងដែរ ។ កីឡាករវ័យ៣៩ឆ្នាំបានបន្តថាការលេងឱ្យ Real Madrid បានផ្លាស់ប្តូរជីវិតរបស់ខ្ញុំក្នុងនាមជាកីឡាករបាល់ទាត់ និងជាមនុស្សម្នាក់។
ខ្ញុំមានមោទនភាពដែលបានក្លាយជាផ្នែកមួយនៃយុគសម័យដ៏ជោគជ័យបំផុតនៃក្លឹបល្អបំផុតក្នុងប្រវត្តិសាស្ត្រ”។ Real នឹងបើកយុទ្ធនាការ Club World Cup របស់ពួកគេទល់នឹងក្រុម Al-Hilal របស់អារ៉ាប៊ីសាអូឌីត នៅថ្ងៃទី១៨ខែមិថុនា ហើយនឹងជួបជាមួយ Pachuca របស់ម៉ិកស៊ិក និងSalzburg របស់អូទ្រីសក្នុងវគ្គចែកពូលផងដែរ៕
(English) FIFA បានប្រកាសពីទីផ្សារដោះដូរកីឡាករពិសេសសម្រាប់ក្លិបទាំង ៣២ ដែលត្រូវចូលរួមប្រកួតពានរង្វាន់ FIFA Club World Cup ២០២៥។ ទីផ្សារពិសេសនេះនឹងចាប់ផ្តើមបើកពីថ្ងៃទី០១ ដល់ថ្ងៃទី១០ ខែមិថុនា ឆ្នាំ២០២៥ ដែលអនុញ្ញាតឱ្យក្រុមនីមួយៗចុះឈ្មោះកីឡាករថ្មីមុនការប្រកួត។ ចាប់ពីថ្ងៃទី០១ ដល់ថ្ងៃទី១០ ខែមិថុនា សមាជិករបស់សមាគមចំនួន២០ នឹងមានឱកាសចុះឈ្មោះកីឡាករថ្មីដែលនឹងមានសិទ្ធិចូលរួមប្រកួតក្នុងការប្រកួតពានរង្វាន់នេះ។
បញ្ជីឈ្មោះចុងក្រោយត្រូវដាក់ជូនត្រឹមថ្ងៃទី១០ ខែមិថុនា ហើយក្រុមនីមួយៗនឹងអាចប្រើប្រាស់កីឡាករដែលពួកគេបានចុះហត្ថលេខាក្នុងអំឡុងពេលនេះនៅសហរដ្ឋអាមេរិក។ លើសពីនេះ ក្លឹបនឹងមានពេលវេលាកំណត់ដើម្បីធ្វើការផ្លាស់ប្តូរបញ្ជីឈ្មោះកីឡាកររបស់ពួកគេក្នុងអំឡុងពេលនៃការប្រកួតដោយខ្លួនឯង នៅចន្លោះថ្ងៃទី២៧ ខែមិថុនា ដល់ថ្ងៃទី៣ ខែកក្កដា ឆ្នាំ២០២៥។ ក្នុងអំឡុងពេលនេះ ក្រុមនឹងអាចជំនួសកីឡាករដែលកិច្ចសន្យាបានផុតកំណត់ និងបន្ថែមកីឡាករថ្មីបានចំនួនពីរនាក់ ដោយមិនលើសពីចំនួនកំណត់ដែលបានចុះឈ្មោះអតិបរមា ៣៥ នាក់។
ការធ្វេីបែបនេះ FIFA មានគោលបំណងជួយសម្រួលដល់កីឡាករដែលមានកិច្ចសន្យាផុតកំណត់ក្នុងការចូលរួមក្នុងការប្រកួត លើកកម្ពស់ដំណោះស្រាយដែលផ្តល់អត្ថប្រយោជន៍ដល់ភាគីទាំងអស់។ ព្រឹត្តិការណ៍ Club World Cup ឆ្នាំ ២០២៥នឹងមានក្រុមចំនួន៣២មកពីសហព័ន្ធចំនួន៦ ដោយចាប់ ផ្តើមប្រកួតនៅថ្ងៃទី១៤ ខែមិថុនា នៅកីឡដ្ឋាន Hard Rock ទីក្រុង Miami និងវគ្គផ្តាច់ព្រ័ត្រនៅថ្ងៃទី១៣ ខែកក្កដា នៅកីឡដ្ឋាន MetLife ក្នុងទីក្រុង New York/New Jersey៕
(English) ទីបំផុត! ក្លិបអ្នកមានបុណ្យ FC Barcelona បានបន្តកុងត្រាថ្មីជូនលោក Hansi Flick រហូតដល់ខែមិថុនា ឆ្នាំ២០២៧។ គ្រូបង្វឹកសញ្ជាតិអាល្លឺម៉ង់ដែលត្រូវបានតែងតាំងដំបូងក្នុងកិច្ចសន្យារយៈពេល ២ឆ្នាំកាលពីខែឧសភា ឆ្នាំ២០២៤ ទទួលបានកុងត្រាថ្មីបន្ថែមទៀត បន្ទាប់ពីដឹកនាំក្លិបឈ្នះពានរង្វាន់ចំនួន ៣ ក្នុងរដូវកាលដំបូងរបស់គាត់។
លោក Hansi Flick ក៏ជាគ្រូបង្វឹកមួយរូបដែលបានដឹកនាំ Barcelona ទទួលបានជ័យជម្នះទាំង ៤ ប្រកួតទល់នឹង Real Madrid ក្នុងរដូវកាលនេះ។ Barca បានឈ្នះពាន La Liga, Copa del Rey និង Spanish Super Cup នៅរដូវកាលនេះ ខណៈពេលដែលពួកគេត្រូវបានផ្តួលដោយ Inter Milan ក្នុងវគ្គពាក់កណ្តាលផ្តាច់ព្រ័ត្រនៃការប្រកួតក្របខណ្ឌ Champions League ។ Flick បានឈ្នះ ៤៣ ប្រកួតក្នុងចំណោម ៥៤ ប្រកួតស្មើនឹង ៧៣ ភាគរយដែលជាកំណត់ត្រាល្អបំផុតនៅក្នុងរដូវកាលដំបូងបន្ទាប់ពីលោក Luis Enrique ដែលដឹកនាំឈ្នះ ៨៣ ភាគរយ។
ក្លិបបាននិយាយនៅក្នុងសេចក្តីថ្លែងការណ៍មួយថា លោកHansi Flick បានធ្វើឱ្យអ្នកគាំទ្រ Barca សប្បាយចិត្តក្នុងរដូវកាលដំបូងរបស់គាត់សម្រាប់ហេតុផលជាច្រើន សម្រាប់ជំនឿដែលគាត់បានផ្តល់ឱ្យក្រុម សម្រាប់ការត្រលប់មកវិញដ៏អស្ចារ្យ និងសម្រាប់ពានរង្វាន់។ភាពរំភើបដែលគ្រូបង្វឹកបាននាំយកមកក្លឹបក្នុងឆ្នាំដំបូងរបស់គាត់បានធ្វើឱ្យ FC Barcelona ក្លាយជាគូប្រជែងដ៏គួរឱ្យភ័យខ្លាចម្តងទៀតនៅអឺរ៉ុប។ Flick ក៏ធ្លាប់បានដឹកនាំ Bayern ឈ្នះពានរង្វាន់៣ដែរ កាលពីឆ្នាំ២០២០ នៅពេលដែលពួកគេបានឈ្នះពាន Bundesliga, German Cup និង Champions League ។ គ្រូបង្វឹកវ័យ៦០ឆ្នាំរូបនេះបានបន្តគ្រប់គ្រងក្រុមជម្រីសជាតិអាល្លឺម៉ង់ ប៉ុន្តែត្រូវបានបណ្តេញចេញនៅខែកញ្ញា ឆ្នាំ២០២៣ មុនពេលចូលមកស្នងតXavi ជាអ្នកចាត់ការក្លឹប Barcelona ៕
ប្រភព៖ BBC
(English) គ្រាប់បាល់បញ្ចូលទីមួយគ្រាប់ក្នុងតង់ទីមួយរបស់ Brennan Johnson គឺគ្រប់គ្រាន់ជួយឱ្យ Tottenham Hotspur យកឈ្នះបិសាចក្រហម Manchester United ដោយលទ្ធផល១-០ លើកពានរង្វាន់ Europa League នៅក្នុងកីឡដ្ឋាន San Mames Barria នៅទីក្រុង Bibao ប្រទេសអេស្ប៉ាញ កាលពីរាត្រីថ្ងៃពុធ។ នេះគឺជាពានរង្វាន់ធំលើកដំបូងសម្រាប់ Tottenham ចាប់តាំងពីឈ្នះពានអង់គ្លេស English League Cup ក្នុងឆ្នាំ២០០៨ និងជាពានទ្វីបអឺរ៉ុបលើកដំបូងចាប់តាំងពីវាឆ្នាំ ១៩៨៤ ដែលក្លិបធ្លាប់ឈ្នះពានរង្វាន់ UEFA Cup ស្មើនឹងពាន Europa League ឥឡូវនេះ។
កីឡាករស៊ុតបញ្ចូលទី Brennan Johnsonបានប្រាប់សារព័ត៌មាន TNT Sports ថា៖ ចាប់តាំងពីខ្ញុំមកទីនេះ Tottenhamបានក្លាយជាក្រុមដ៏ល្អមួយ ប៉ុន្តែយើងមិនដែលឈ្នះពានអ្វីឡើយ។ Johnson បន្តថា និយាយតាមត្រង់ទៅ វាមានន័យខ្លាំងណាស់។ យើងបានទទួលវាលើកទីមួយក្នុងពេលនេះ។ ខ្ញុំសប្បាយចិត្តណាស់។ ពាននេះក៏ធានាឱ្យ Spurs ទទួលបានកៅអីមួយក្នុង Champions League នៅរដូវកាលក្រោយ ហើយក៏ជាឱកាសមួយដែលអាចឲ្យក្លឹបពិចារណាឡីងវិញទៅលេីតំណែងរបស់ Ange Postecoglou បន្ទាប់ពីគាត់បានតស៊ូដឹកនាំក្លឹបយ៉ាងលំបាកពេញមួយឆ្នាំ។
ប្រភព៖ AP
(English) ការជួបគ្នារវាងបិសាចក្រហម Manchester United និងមាន់ខ្នាយមាស Tottenham គឺជាជំនួបដ៏អាក្រក់បំផុតមិនដែលមាននៅក្នុងប្រវត្តិសាស្ត្រ នៃការប្រកួតពានរង្វាន់អឺរ៉ុបវគ្គផ្តាច់ព្រ័ត្រ។ ហេតុអ្វីបានជាគេចាត់ទុកថាជាប្រវត្តិសាស្ត្រអាក្រក់បំផុត?អាក្រក់ក៏ដោយសារតែមានកក្តាមួយចំនួនដូចខាងក្រោមគឺៈ
ទី១-ក្រុមដែលត្រូវប្រកួតវគ្គផ្តាច់ព្រ័ត្រពានរង្វាន់ Europa League នៅទីក្រុង Bilbao ប្រទេសអេស្ប៉ាញនារាត្រីនេះ រវាងក្រុម Manchester United និង Tottenham គឺជាក្រុមបញ្ចប់ចំណាត់ថ្នាក់ទាបបំផុតនៅក្នុងលីគមិនធ្លាប់មានក្នុងការឈ្នះពានរង្វាន់ធំនៅអឺរ៉ុប។ United ឈរនៅលេខរៀងទី១៦ និង Spurs លេខ១៧ ក្នុងតារាងក្នុង Premier League ។
ទី២-ប្រាកដណាស់ពួកគេនឹងក្លាយជាក្រុមដែលមានចំណាត់ទាបបំផុតដែលមិនធ្លាប់មាន មានសិទ្ធិសម្រាប់ការប្រកួតពានរង្វាន់អឺរ៉ុបChampions League រដូវកាលក្រោយ។
ទី៣-ក្រុមទាំងពីរចាញ់ការប្រកួតច្រើនបំផុតសរុប ៣៩ប្រកួតគិតត្រឹមជុំទី៣៧ Manchester United ចាញ់១៨ Tottenham ចាញ់២១)។សរុបការប្រកួតទាំងអស់(ក្រៅលីគ)ក្រុមទាំងពីរចាញ់៤៤ប្រកួត។
ទី៤-ពិន្ទុសរុបរបស់ក្រុមនីមួយៗ ធ្វើឱ្យពួកគេធ្លាក់ទៅក្របខណ្ឌ Championship ធៀបទៅនឹងរដូវកាលមុន។
ទី៥-Ange Postecoglou ទោះបីឈ្នះពាន Europa League ក៏ដោយ ក៏គាត់នៅតែត្រូវក្លឹបបណ្តេញចេញ។ផ្ទុយទៅវិញ ប្រសិនបើ Ruben Amorim ចាញ់ គាត់នៅបន្តទៀត។
ជុំវិញនឹងបញ្ហានេះ លោក Chris Sutton អតីតខ្សែប្រយុទ្ធ Celtic បាននិយាយនៅក្នុងកម្មវិធី Monday Night Club របស់ BBC Radio 5 Live ថា ខ្ញុំទទ្ទឹងរង់ចាំមើលការប្រកួតបែបនេះដែលមានសម្ពាធយ៉ាងខ្លាំងសម្រាប់ក្រុមទាំងពីរ។ ក្រុមមួយក្នុងចំណោមពួកគេនឹងអបអរសាទរជ័យជម្នះជាមួយនឹងការវិលត្រឡប់ទៅក្របខ័ណ្ឌ Champions League នៅរដូវកាលក្រោយ៕
(English) ក្នុងការបង្ហាញខ្លួនចុងក្រោយនៅឯកីឡដ្ឋាន Etihad អំឡុងពេលទទួលបានជ័យជម្នះ ៣-១ទៅលើ Bournemouth កាលពីរាត្រីថ្ងៃអង្គារ ក្លិប Manchester City បានប្រកាសថា នឹងរៀបចំសាងសង់ រូបសំណាកកីឡាករ Kevin De Bruyne ដើម្បីគោរពដល់ទសវត្សរ៍នៃការរីកចម្រីនដ៏គួរឱ្យកត់សម្គាល់ជាប្រវត្តិសាស្ត្រ។ ខ្សែបម្រើវ័យ ៣៣ ឆ្នាំដែលគ្រោងនឹងចាកចេញពី Man City នៅរដូវក្តៅនេះ បានក្លាយជាតួអង្គដ៏លេចធ្លោបំផុតក្នុងប្រវត្តិសាស្ត្រ។ ចាប់តាំងពីចូលរួមជាមួយមេឃខៀវ Manchester City ពីក្លិប Wolfsburg ក្នុង ២០១៥ De Bruyne បានបង្ហាញវត្តមានជាង ៤០០ ប្រកួត និងឈ្នះពានរង្វាន់ធំៗចំនួន១៩ ជួយបង្កើតយុគសម័យដ៏ជោគជ័យបំផុតមួយក្នុងប្រវត្តិសាស្ត្ររបស់ក្លិប។
ដោយសារតែជោគជ័យទាំងនេះហើយ City សម្រេចកសាងរូបសំណាក De Bruyne នៅខាងក្រៅពហុកីឡដ្ឋាន Etihad ជាកន្លែងដែលគាត់នឹងចូលរួមជាមួយវីរបុរសក្លឹបពីមុនៗមករួមមាន Vincent Kompany, David Silva និង Sergio Aguero ដែលត្រូវបានប្រារព្ធឡើងជាមួយនឹងរូបចម្លាក់ក្នុងប៉ុន្មានឆ្នាំថ្មីៗនេះផងដែរ។ De Bruyne បាននិយាយបន្ទាប់ពីការប្រកួតជាមួយពិធីករ Matchday Live Natalie Pike ថា វាមានន័យថាខ្ញុំនឹងជាផ្នែកមួយនៃក្លឹបនេះជារៀងរហូត។ រាត្រីដ៏រំជួលចិត្តនៅEtihad ក្រោយការប្រកួតពិសេស កីឡាករសញ្ជាតិបែលហ្ស៊ិកបានទទួលអាវពិសេស ដែលមានចុះហត្ថលេខាដោយមិត្តរួមក្រុម និងបុគ្គលិករបស់ក្លឹប ។
នៅព្រឹកថ្ងៃដដែលនោះដែរ ប្រធានក្លឹប City លោក Khaldoon Al Mubarak បានបង្ហាញរូបចម្លាក់អនុស្សាវរីយ៍កិត្តិយសរបស់ De Bruyne នៅសាលាបាល់ទាត់ទីក្រុង (CFA) ដោយបន្តប្រពៃណីរបស់ក្លឹបក្នុងការអបអរសាទរដល់កីឡាកដ៏អស្ចារ្យបំផុតរបស់ខ្លួន ដែលុំមានៅក្នុងបញ្ជីរួមមាន Yaya Toure, Joe Hart និង Ilkay Gundogan ៕
(English) លោក Pep Guardiola បាននិយាយថា៖ ខ្ញុំនឹងលាលែងពីតំណែងគ្រូបង្វឹក ប្រសិនបើក្លិប Manchester City មិនព្រមកាត់បន្ថយចំនួនកីឡាករ ឬទំហំក្លឹបឲ្យរួមតូច បន្ទាប់ពីទីផ្សារដោះដូរកីឡាកររដូវក្តៅ។ លោក Guardiola បាននិយាយបន្ទាប់ពីទទួលជ័យជម្នះ ៣-១ លើក្រុម Bournemouth ថា៖ «ខ្ញុំបានប្រាប់ក្លឹបថា ខ្ញុំមិនចង់បានកីឡាករច្រីនទេ។ ខ្ញុំនឹងលាឈប់។ បង្កើតក្រុមតូចជាងនេះ ខ្ញុំនឹងនៅ។ ខ្ញុំមិនចង់ឃេីញពួកគេអង្គុយនៅកៅអីបម្រុងរហូតនោះទេ។
កីឡាករវ័យចំណាស់មួយចំនួនរបស់ Man City មិនត្រូវបានរាប់បញ្ចូលក្នុងក្រុមសម្រាប់ជ័យជម្នះ 3-1 កាលពីថ្ងៃអង្គារលើក្រុម Bournemouth ហើយលោក Guardiola និយាយថាគាត់មិនសប្បាយចិត្តក្នុងការចាកចេញពីកីឡាករជាច្រើននោះទេ។ Abdukodir Khusanov, Savinho, James McAtee, Claudio Echeverri និង Rico Lewis អវត្តមានក្នុងជម្រីសកីឡាក២០រូប កាលពីថ្ងៃអង្គារ ខណៈដែល Man City បានឈានទៅចំណាត់ថ្នាក់លេខ ៣ ក្នុងក្របខណ្ឌ Premier League និងក្នុងវគ្គជម្រុះ Champions League ។
បុរសសញ្ជាតិអេស្ប៉ាញវ័យ ៥៤ ឆ្នាំរូបនេះបានបន្ថែមថា “ប្រហែលជាបីបួនខែយើងមិនអាចជ្រើសរើសកីឡាករ 11 នាក់បានទេ យើងមិនមានខ្សែការពារ វាពិបាកណាស់។ អ្នកចាត់ការទូទៅរបស់ City បានចាប់ផ្តើមកសាងក្រុមរបស់គាត់ឡើងវិញ បន្ទាប់ពីយុទ្ធនាការគ្មានពានរង្វាន់ជាលើកដំបូងចាប់តាំងពីឆ្នាំ២០១៧ ៕
