ព័ត៌មានកីឡាអន្តរជាតិ
(English) ទោះបីឈ្នះពានរង្វាន់ Club World Cup 2025 បន្ទាប់ពីផ្តួលម្ចាស់ជើងឯក Champions League Paris Saint Germain ដោយលទ្ធផល ៣-០ កាលពីល្ងាចថ្ងៃអាទិត្យនៅឯកីឡដ្ឋាន MetLife នៃរដ្ឋ New Jersey សហរដ្ឋអាមេរិក ក៏ក្លិប Chelsea មិនទាន់ទទួលបានលក្ខណៈសម្បត្តិគ្រប់គ្រាន់សម្រាប់ការប្រកួតពានរង្វាន់នេះនៅ២ ០២៩ នៅឡើយទេ ខណៈដែលក្រុមរងជើងឯក PSG មានកៅអីមួយរួចហើយ។
ពានរង្វាន់នេះគ្មានកៅអីស្វ័យប្រវត្តិទេ ទោះបីជាម្ចាស់ជើងឯកក៏ដោយ។ Chelsea ត្រូវតែឆ្លងកាត់ការជម្រុះជាមុនសិនដេម្បីទទួលបានកៅអី ១ ក្នុងចំណោមកៅអីទាំង ១២ របស់UEFA។ ផ្ទុយទៅវិញ PSG មានកៅអីរួចហើយដោយសារជាម្ចាស់ជើងឯក UEFA Champions League។ ជាមួយគ្នានេះដែរក្រុមចំនួន៣ផ្សេងទៀតក៏ទទួលបានកៅអីរួចហើយដែរ គឺក្រុមបាល់ទាត់ម៉ិកស៊ិក Cruz Azul ម្ចាស់ពានរង្វាន់ CONCACAF Champions Cup ឆ្នាំ ២០២៥ ។ ក្លិបបាល់ទាត់អេហ្ស៊ីប Pyramids និងក្រុម Al-Ahli របស់អារ៉ាប៊ីសាអូឌីត ក៏ធានាបានកន្លែងរបស់ពួកគេដោយការឈ្នះ CAF Champions League និង AFC Champions League Elite រៀងៗខ្លួន៕
(English) យោងតាមតួលេខផ្លូវការ ម្ចាស់ជើងឯកពានរង្វាន់ FIFA Club World Cup ២០២៥ ទទួលបានប្រាក់រង្វាន់សរុប ជាង ១២៥ លានដុល្លារ ដែលជាប្រាក់រង្វាន់ច្រើនបំផុតក្នុងប្រវត្តិសាស្ត្របាល់ទាត់។ Chelsea ទទួលបាន ប្រាក់រង្វាន់៤០លានដុល្លារសម្រាប់ការឈ្នះវគ្គផ្តាច់ព្រ័ត្រទៅលើ Paris Saint Germain បន្ថែមទៅនឹងប្រាក់រង្វាន់៨៥ លានដុល្លារសម្រាប់ការឈ្នះនៅដំណាក់កាលនីមួយៗ។ ជាមួយនឹងប្រាក់រង្វាន់ដ៏ច្រើននេះ តើកីឡាករម្នាក់ៗ ទទួលលុយប៉ុន្មាន?
យោងតាមការចេញផ្សាយរបស់គេហទំព័រ Legit.ng កាលពីថ្ងៃពុធទី ១៦ កក្កដា ២០២៥ បានឱ្យដឹងថា៖ ក្នុងចំណោមប្រាក់រង្វាន់ទាំងនោះ កីឡាករម្នាក់ៗនឹងទទួលបានប្រាក់រង្វាន់ជាង ៤៦ ម៉ឺនដុល្លារ ។ ទោះបីជាមិនផ្តល់ប្រាក់បៀវត្សរ៍គោលខ្ពស់បំផុតក៏ដោយ កីឡាករនឹងទទួលបានប្រាក់រង្វាន់ដ៏ច្រើន។ គំរូលើកទឹកចិត្តរបស់ក្លិបជាមួយនឹងប្រាក់រង្វាន់គឺទាក់ទងនឹងសមិទ្ធិផលជាក់លាក់ដូចជា វគ្គជម្រុះ Champions League និងការឈ្នះពានរង្វាន់។ វគ្គជម្រុះសម្រាប់ការប្រកួត Champions League បានបង្កឱ្យមានការកើនឡើងប្រាក់ឈ្នួលម្ភៃភាគរយសម្រាប់ក្រុម ខណៈដែលប្រាក់បន្ថែមត្រូវបានទទួលសម្រាប់ជ័យជម្នះ Europa Conference League ។
សរុបមក ១៥៣,៦៦ លានដុល្លារសម្រាប់ការងារក្នុងមួយខែ ដែលជាចំនួនដ៏ធំនៃប្រាក់រង្វាន់ដែលពួកគេរកបានក្នុងរដូវកាលនេះ។ សម្រាប់ការប្រៀបធៀប ការបង់ប្រាក់ទៅឱ្យអ្នកបញ្ចប់ក្នុងចំណាត់ថ្នាក់លេខ ៤ នៅ Premier League ក្នុងរដូវកាល ២០២៤-២៥ គឺជិត ២២០ លានដុល្លារ៕
(English) Manchester City បានបន្តកុងត្រាថ្មីជាមួយក្រុមហ៊ុនសម្លៀកបំពាក់កីឡា Puma រយៈពេល ១០ ឆ្នាំទៀត ជាមួយនឹងតម្លៃជាង ១,៣៣ពាន់លានដុល្លារ ដែលធ្វើឱ្យវាក្លាយជាកិច្ចព្រមព្រៀងដ៏ធំបំផុតនៅក្នុង ប្រវត្តិសាស្ត្រ Premier League ។ កាលពីឆ្នាំ ២០១៩ City បានចុះហត្ថលេខាលើកិច្ចព្រមព្រៀងជាមួយក្រុមហ៊ុនផលិតសម្លៀកបំពាក់អាល្លឺម៉ង់តម្លៃត្រឹមតែជាង ៨៧ លានដុល្លារក្នុងមួយរដូវកាល តែពេលនេះគេបានយល់ព្រមបន្តរហូតដល់ឆ្នាំ២០៣៥ ជានឹងតម្លៃបំបែកកំណត់ត្រាជាង ១៣៣ លានដុល្លារក្នុងមួយឆ្នាំ។
តួលេខនេះលើសពីកិច្ចព្រមព្រៀងតម្លៃជាង ១២០ លានដុល្លារ ដែល គូប្រជែង Manchester United ចុះហត្ថលេខាជាមួយ Adidas ក្នុងឆ្នាំ២០២៣ ខណៈដែលម្ចាស់ជើងឯក Liverpool ក៏នឹងនៅជាមួយក្រុមហ៊ុនផលិតដូចគ្នាចាប់ពីរដូវកាលនេះបន្ទាប់ពីបានយល់ព្រមក្នុងតម្លៃជាង ៨០ដុល្លារក្នុងមួយរដូវកាល។ Man City ទទួលបានភាពជោគជ័យដែលមិនធ្លាប់មានពីមុនមកចាប់តាំងពីឆ្នាំ២០១៩ ដោយបានឈ្នះពានរង្វាន់ Premier League ចំនួន ៤ក៏ដូចជាឈ្នះពាន៣កាលពីពីរឆ្នាំមុន ប៉ុន្តែបានបញ្ចប់កាលដូវកាលមុនដោយគ្មានពានរង្វាន់ធំ។
កាលពីថ្ងៃទី៣០ ខែមិថុនា ឆ្នាំ២០២៤ City បានប្រកាសពីប្រាក់ចំណូលកំណត់ត្រា Premier League ក្នុងតម្លៃ ៩៥៧ លានខណៈប្រាក់ចំណូលពាណិជ្ជកម្មបានកើនឡើងពី ៤៥៦ លានផោនដល់ ៤៦០ លានដុល្លារ។ លោក Ferran Soriano នាយកប្រតិបត្តិនៃក្រុម City Football Group (CFG) បាននិយាយថា យើងបានចូលរួមជាមួយក្រុមហ៊ុន Puma ជាមួយនឹងមហិច្ឆតាដើម្បីប្រកួតប្រជែង។ យើងសម្រេចបាននូវសមិទ្ធផលជាច្រីនក្នុងរយៈពេលប្រាំមួយរដូវកាលចុងក្រោយនេះ។ ចំណែកឯនាយកប្រតិបត្តិក្រុមហ៊ុន Puma លោក Arthur Hoeld បានបន្ថែមថា “ភាពជាដៃគូរបស់ Puma ជាមួយ Manchester City បានទទួលជោគជ័យយ៉ាងខ្លាំងទាំងក្នុង និងក្រៅទីលាន។ពានរង្វាន់ ដែលជាដំណាក់កាលដ៏ល្អឥតខ្ចោះសម្រាប់ផលិតផលដំណើរការ និងភាពជោគជ័យផ្នែកពាណិជ្ជកម្មរបស់យើងគឺពិសេស៕
ប្រភព៖ BBC
ព័ត៌មានកីឡាអាស៊ី
(English) សមាគមកីឡាបាល់ទាត់ម៉ាឡេស៊ី (FAM) បានដកជម្រើសជាតិរបស់ខ្លួន ចេញពីពានរង្វាន់ CAFA Nations Cup ជាផ្លូវការហើយ បន្ទាប់ពីពានរង្វាន់នេះបានផ្លាស់ប្តូរកាលវិភាគការប្រកួតនៅខាងក្រៅប្រតិទិនរបស់ FIFA (ថ្ងៃទី 29 ខែសីហា ដល់ថ្ងៃទី 8 ខែកញ្ញា)។ នេះមានន័យថាក្លិបមិនមានកាតព្វកិច្ចបញ្ចេញកីឡាករឱ្យជម្រើសជាតិទេ។
ខណៈដែលកីឡាករសំខាន់ៗមានមូលដ្ឋាននៅប្រទេសអេស្ប៉ាញ អាហ្សង់ទីន កូឡុំប៊ី និងជប៉ុន គ្រូបង្វឹកលោក Peter Cklamovski និយាយថា ដោយសារតែពានរង្វាន់នេះមិនស្ថិតក្នុងថ្ងៃ FIFA DAY អញ្ចឹងហើយ ក្លិបនានាមិនបានបញ្ចេញកីឡាករមកលេងជម្រើសជាតិទេ។ ដូច្នេះការប្រមូលផ្តុំក្រុមល្អបំផុតក្រោមលក្ខខណ្ឌទាំងនេះមិនអាចទៅរួចទេ»។ ពេលនេះ ម៉ាឡេស៊ីប្តូរការផ្តោតអារម្មណ៍ទាំងស្រុងទៅលើកាលវិភាគប្រកួតក្នុងខែកញ្ញា ដោយត្រៀមខ្លួនសម្រាប់ការប្រកួតជម្រុះ Asian Cup ដែលពួកគេត្រូវការឈ្នះដាច់ខាតទល់នឹង ឡាវ និងនេប៉ាល់៕
ប្រភព៖ ASEANFOOTBALL
(English) Liverpool នឹងដាក់អាវលេខ ២០ ចូលនិវត្តន៍ដើម្បីជាកិត្តិយសដល់ខ្សែប្រយុទ្ធ Diogo Jota ដែលបានស្លាប់យ៉ាងសោកនាដកម្មក្នុងគ្រោះថ្នាក់ចរាចរណ៍ជាមួយនឹងបងប្រុស Andre Silva កាលពីសប្តាហ៍មុន។ ហង្សក្រហមបានធ្វើការសម្រេចចិត្តបែបនេះបន្ទាប់ពីបានពិគ្រោះជាមួយប្រពន្ធរបស់ Jota គឺលោកស្រី Rute Cardoso និងក្រុមគ្រួសាររបស់គាត់ ដែលមានន័យថាកីឡាករអន្តរជាតិព័រទុយហ្គាល់នឹងក្លាយជាកីឡាករពាក់អាវលេខ ២០ របស់ Liverpool ជារៀងរហូត។ សេចក្តីថ្លែងការណ៍របស់ Liverpool បាននិយាយថាអាវលេខ២០នឹងត្រូវបានចូលនិវត្តន៍ក្នុងកិត្តិយស និងការចងចាំរបស់ Diogo នៅគ្រប់កម្រិតទាំងអស់” រួមទាំងក្រុមនារី និងគ្រប់សាលាបាល់ទាត់ទាំងអស់។
ពួកគេបានបន្ថែមថា នេះគឺជាការទទួលស្គាល់មិនត្រឹមតែការរួមចំណែកដែលមិនអាចកាត់ថ្លៃបានដរបស់កូនក្រុមមកពីប្រទេសព័រទុយហ្គាល់បានធ្វើចំពោះភាពជោគជ័យនៅលើទីលានរបស់ហង្សក្រហមក្នុងរយៈពេល ៥ ឆ្នាំចុងក្រោយនេះប៉ុណ្ណោះទេ ប៉ុន្តែក៏មានផលប៉ះពាល់ផ្ទាល់ខ្លួនយ៉ាងជ្រាលជ្រៅដែលគាត់មានចំពោះមិត្តរួមក្រុម មិត្តរួមការងារ និងអ្នកគាំទ្រ ព្រមទាំងទំនាក់ទំនងដ៏អស្ចារ្យដែលគាត់បានកសាងជាមួយពួកគេ។ Jota បានចូលរួមជាមួយ Liverpool ពី Wolves ក្នុងឆ្នាំ ២០២០ ដោយស៊ុតបញ្ចូលទីបាន ៦៥គ្រាប់ក្នុងការបង្ហាញខ្លួន១៨២ប្រកួត។ គាត់ក៏បានជួយពួកគេឱ្យឈ្នះពានរង្វាន់ FA Cup និង League Cup ក្នុងឆ្នាំ២០២២ថែមទាំងឈ្នះចុងក្រោយនៅឆ្នាំ២០២៤ និងពានរង្វាន់ Premier League កាលពីរដូវកាលមុន៕
(English) ទីបំផុត! ក្លិបអធិរាជ-ស Real Madrid បានចុះហត្ថលេខានាំយកខ្សែការពារ Alvaro Carreras ជាមួយនឹងកិច្ចសន្យារយៈពេល ៦ ឆ្នាំពី Benfica ក្នុងតម្លៃផ្ទេរប្រមាណ ៥០ លានផោន។ ជាការពិតណាស់! កីទ្បាករសញ្ជាតិអេស្ប៉ាញវ័យ ២២ ឆ្នាំរូបនេះគឺជាយុវជនថ្នាលរបស់ Real Madrid នៅក្នុងឆ្នាំ ២០១៧ ដល់ ២០២០ មុនពេលចូលរួមជាមួយនឹងក្លិបបិសាចក្រហម Manchester United។ Alvaro Carreras បានលេងឱ្យក្រុម Preston និង Granada ក្នុងលក្ខខណ្ឌខ្ចីពី United ប៉ុន្តែរូបគេមិនមានឱកាសបង្ហាញខ្លួននៅឯកីទ្បដ្ឋាន Old Trafford ជាមួយនឹងក្រុមធំទ្បើយ មុនពេលផ្លាស់ទៅកាន់ Benfica ក្នុងខែមករា ឆ្នាំ២០២៤ ក្នុងលក្ខខណ្ឌខ្ចីជើង បន្ទាប់មកក៏យកពី United ផ្តាច់កុងត្រាក្នុងតម្លៃផ្ទេរ ៥ លានផោន ក្នុងខែឧសភា ឆ្នាំ២០២៤ តែម្តង។
Benfica បាននិយាយថា៖ ក្នុងការប្រកាសពីការផ្ទេររបស់រូបទៅ Real Madrid ខាងក្រៅថា Manchester United នឹងទទួលបាន ២០% លើអ្វីដែលលើសពីចំនួនដែលពួកគេបានចំណាយសម្រាប់កីឡាករ។ Carreras ដែលបានបង្ហាញខ្លួន ៦៨ ដងឱ្យ Benfica និងស៊ុតបញ្ចូលទីបាន ៥ គ្រាប់បានជួយឱ្យពួកគេបញ្ចប់ក្នុងចំណាត់ថ្នាក់លេខ ២ ក្នុងក្របខណ្ឌកំពូលព័រទុយហ្គាល់ កាលពីរដូវកាលមុន និងជាផ្នែកមួយនៃក្រុមរបស់ពួកគេនៅ Club World Cup ផងដែរ ៕
(English)
យោងតាមការចុះផ្សាយរបស់សារព័ត៌មាន CNA បានឱ្យដឹងថា៖ ក្លិប Al-Nassr បានតែងតាំងលោក Jorge Jesus ធ្វើជាគ្រូបង្វឹក បន្ទាប់ពីចាកចេញពី Al-Hilal ដែលជាគូរប្រជែងរបស់ក្រុមថ្មីរបស់លោកនៅក្នុងក្របខណ្ឌលីគកំពូលអារ៉ាប៊ីសាអូឌីត Saudi Pro-League..។
បុរសសញ្ជាតិព័រទុយហ្គាល់វ័យ ៧០ ឆ្នាំរូបនេះបានដឹកនាំក្រុម Al-Hilal ឈ្នះពានរង្វាន់ចំនួន ៣ ក្នុងស្រុក កាលពីរដូវកាល ២០២៣-២៤ ប៉ុន្តែបានចាកចេញពីក្លិបនៅក្នុងខែឧសភា បន្ទាប់ពីចាញ់ Al-Ahli នៅវគ្គ ៤ ក្រុមចុងក្រោយ ក្នុងពានរង្វាន់ AFC Champions League elite..។ សូមជម្រាបថា លោក Jorge Jesus ជាអតីតគ្រូបង្វឹកដឹកនាំក្លិប Flamengo (លីគទី ១ របស់ប្រទេសប្រេស៊ីល) ឈ្នះពានរង្វាន់ចំនួន ៣ ក្នុងស្រុក មកជំនួសតំណែងរបស់គ្រូបង្វឹកសញ្ជាតិអ៊ីតាលី លោក Stefano Pioli ដែលបានចុះកិច្ចសន្យារយៈពេលមួយឆ្នាំជាមួយ Al-Nassr..៕
(English) គ្រូបង្វឹកក្រុមជម្រើសជាតិអ៊ីរ៉ាក់ លោក Graham Arnold បានពន្យល់ពីហេតុផលនៅពីក្រោយការសម្រេចចិត្តរបស់អ៊ីរ៉ាក់ ក្នុងការចូលរួមប្រកួតពានរង្វាន់ King’s Cup 2025 ក្នុងខែកញ្ញា បើទោះបីជាដំបូងបានបដិសេធមិនចូលរួមក៏ដោយ។ លោកបាននិយាយថា៖ «ក្នុងរយៈពេលពីរសប្តាហ៍កន្លងមកនេះ យើងបានទាក់ទងជាមួយក្រុមបាល់ទាត់ជម្រើសជាតិអាស៊ីកំពូលៗជាច្រើន ដើម្បីរៀបចំការប្រកួតមិត្តភាព ប៉ុន្តែពួកគេទាំងអស់ជាប់ដៃណាត់ ការប្រកួត ជាមួយក្រុមផ្សេងទៀតរួចហើយ»។
«យើងថែមទាំងបានទាក់ទងទៅសមាគមកីឡាបាល់ទាត់គុយវ៉ែត ដើម្បីរៀបចំការប្រកួតមិត្តភាពនៅខែកញ្ញា ប្រហែលជានៅទីក្រុង Basra ឬសូម្បីតែនៅប្រទេសគុយវ៉ែតតែម្ដង ប៉ុន្តែពួកគេបានសុំទោស ខណៈដែលពួកគេកំពុងធ្វើដំណើរទៅកាន់ប្រទេសវៀតណាម »។ ការសម្រេចចិត្តចូលរួមក្នុងពានរង្វាន់ King’s Cup 2025 បានកើតឡើងបន្ទាប់ពីក្រុមជម្រើសអូឡាំពិកអារ៉ាប៊ីសាអូឌីតបានដកខ្លួនចេញ ហើយសហព័ន្ធបាល់ទាត់អ៊ីរ៉ាក់បានផ្លាស់ប្តូរចិត្តមកចូលរួមឡើងវិញ។ លោក Graham Arnold បានបន្ថែមថា ៖«យើងមិនចង់ជួបជាមួយ អារ៉ាប៊ីសាអូឌីត ក្នុងដំណាក់កាលនេះទេ ដូច្នេះការប្រកួតនេះបង្ហាញ ពីឱកាសដ៏ល្អសម្រាប់ខ្ញុំក្នុងការយល់ដឹងកាន់តែច្បាស់អំពីកីឡាកររបស់ខ្ញុំ»។
(English) ការប្រកួតបាល់ទាត់ក្របខ័ណ្ឌអ៊ីតាលី Serie A រវាងក្រុមពីរដែលមានចម្ងាយប្រហែល ៥០ គីឡូម៉ែត្រពីគ្នាអាចនឹងប្រារព្ធធ្វើឡើងនៅប្រទេសអូស្ត្រាលីឆ្នាំក្រោយ។ សហព័ន្ធបាល់ទាត់អ៊ីតាលីបានប្រកាសកាលពីថ្ងៃព្រហស្បតិ៍ថា យើងកំពុងមានគម្រោងមួយដើម្បី នាំយក ការប្រកួតក្របខ័ណ្ឌ Serie A រវាងក្រុម AC Milan និងក្រុម Como នៅទីក្រុង Perth ប្រទេសអូរស្ត្រាលីនៅក្នុងខែកុម្ភៈ។ FIGC បាននិយាយនៅក្នុងសេចក្តីថ្លែងការណ៍មួយថា ក្រុមប្រឹក្សាភិបាលបានផ្តល់មតិវិជ្ជមានចំពោះសំណើរបស់លីកក្នុងការប្រកួត Milan-Como នៅទីក្រុង Perth។ យើងកំពុងពិចារណាពីការប្រកួតនៅក្រៅដីជាប្រវត្តិសាស្ត្រ ដោយពិចារណាថានីតិវិធីដ៏ស្មុគស្មាញក៏ត្រូវការភ្លើងខៀវជាផ្លូវការពីសហព័ន្ធអូស្ត្រាលី UEFA សហព័ន្ធបាល់ទាត់អាស៊ី និង FIFA ផងដែរ។
លីគបាល់ទាត់អេស្ប៉ាញបានព្យាយាមយ៉ាងហោចណាស់បីដងក្នុងរយៈពេល ៧ឆ្នាំចុងក្រោយនេះ ដើម្បីប្រកួតរដូវកាលធម្មតាទៅកាន់សហរដ្ឋអាមេរិក។ ផែនការនៅក្នុងឆ្នាំ២០១៨និង ២០១៩ ត្រូវបានលុបចោលបន្ទាប់ពីមានការប្រឆាំងដោយសហព័ន្ធបាល់ទាត់របស់ប្រទេសអេស្ប៉ាញ និងសហជីពរបស់កីឡាករ ខណៈដែលសំណើមួយផ្សេងទៀតត្រូវបានលុបចោលកាលពីឆ្នាំមុនដោយសារតែពេលវេលាកំណត់។ FIGC ជឿជាក់ថា UEFA អាចអនុម័តគម្រោងនេះដោយសារតែ ភាពពិសេសដាច់ខាតនៃសំណើ”។ ការប្រកួតគ្រោងធ្វើឡើងនៅចុងសប្តាហ៍នៃថ្ងៃទី៧-៨ ខែកុម្ភៈ ប៉ុន្តែកីឡដ្ឋាន San Siro របស់ Milan នឹងរៀបចំពិធីបើកព្រឹត្តិការណ៍កីឡាអូឡាំពិករដូវរងានៅថ្ងៃសុក្រ៕
