ក្រុមបាល់ទាត់នារីវៀតណាម បង្កើនការហ្វឹកហាត់របស់ខ្លួន ដើម្បីត្រៀមប្រកួតកីឡាអាស៊ីអាគ្នេយ៍លើកទី៣១។ ក្រុម​ដែល​មាន​កីឡាករ​២៦​រូប​បាន​ចាក​ចេញ​ទៅ​ប្រទេស​កូរ៉េ​ខាងត្បូង ហើយ​នឹង​មាន​ការ​ប្រកួត​មិត្តភាព​ជាមួយ​ក្រុម​បាល់ទាត់​ជម្រើស​ជាតិ​កូរ៉េទៀតផង។

ក្រៅ​ពី​ការ​ប្រកួត​មិត្ត​ភាព​របស់​ខ្លួន​ដែល​នឹង​ធ្វើ​ឡើង​នៅ​ថ្ងៃ​ទី ៩ ខែ​មេសា និង​នៅ​ថ្ងៃ​ទី ១១ ខែ​មេសា ក្រុម​វៀតណាម​នឹង​មាន​ការ​ប្រកួត​មិត្ត​ភាព​ចំនួន ៤ ទៀត​ជាមួយ​នឹង​ក្លិបបាល់​ទាត់​នារី​ខ្លាំងៗ​ក្នុង​ស្រុក​នៅ​ថ្ងៃ​ទី ១៣, ១៥, ១៧ និង ១៩ ខែ​មេសា។

ក្រុម​នារី​វៀតណាម​ស្ថិត​ក្នុង​ពូល A ក្នុង​ការ​ប្រកួត​កីឡា​ស៊ីហ្គេម​លើក​ទី​៣១ រួម​ជាមួយ​ហ្វីលីពីន ឥណ្ឌូនេស៊ី និង​កម្ពុជា។ ខណៈ​ពូល B មាន​ថៃ មីយ៉ាន់ម៉ា សិង្ហបុរី និង​ឡាវ។

កិច្ចការ​ទី​១​របស់​វៀតណាម​គឺ​ប៉ះ​ឥណ្ឌូណេស៊ី​ថ្ងៃ​ទី​៩​ឧសភា ហ្វីលីពីន​ថ្ងៃ​១១​ឧសភា និង​កម្ពុជា​ថ្ងៃ​១៤​ឧសភា។ ក្រុមវៀតណាមជាក្រុមការពារជើងឯកស៊ីហ្គេម។

អាវដែលពាក់ដោយលោក Diego Maradona កំឡុងពេល អាហ្សង់ទីនប៉ះអង់គ្លេសក្នុងវគ្គផ្ដាច់​ព្រ័ត្រព្រឹត្តិការណ៍ World Cup ក្នុងឆ្នាំ 1986 នឹងត្រូវដាក់លក់ដេញថ្លៃ។

នៅថ្ងៃទី 22 ខែមិថុនា ឆ្នាំ 1986 លោក Maradona បានបង្កើតប្រវត្តិសាស្ត្រមួយដោយអះអាងថា ការ​លោត​តែត​តែបាល់​ប៉ះដៃដែលជួយគាត់រកបាន​គ្រាប់បាល់ដំបូងគឺ “ដៃរបស់ព្រះ” ។

អាវលេខ 10 ដ៏ល្បីល្បាញរបស់វីរបុរសសញ្ជាតិអាហ្សង់ទីនត្រូវបានកាន់កាប់អស់រយៈពេលជាង 35 ឆ្នាំដោយអតីតខ្សែបម្រើជម្រើស​ជាតិអង់គ្លេស Steve Hodge ដែលបានកាល​នោះបានធ្វើ​ការប្តូរអាវជាមួយ Maradona ។

អាវនេះនឹងដាក់លក់ហើយ ហើយត្រូវបានគេប៉ាន់ប្រមាណថានឹងអាចទិញបានយ៉ាងហោចណាស់៤លានផោននៅក្នុងការដេញថ្លៃមួយក្នុងចក្រភពអង់គ្លេស។ Hodge បាននិយាយថា៖ “អាវនេះមានអត្ថន័យវប្បធម៌ជ្រៅចំពោះពិភពបាល់ទាត់ ប្រជាជនអាហ្សង់ទីន និងប្រជាជនអង់គ្លេស ហើយខ្ញុំប្រាកដក្នុងចិត្តថាម្ចាស់ថ្មីនឹងមានមោទនភាពយ៉ាងក្រៃលែងក្នុងការកាន់កាប់អាវកីឡាបាល់ទាត់ដ៏ល្បីល្បាញបំផុតរបស់ពិភពលោក”។

ប្រភព៖ Guardian

កីឡាករវ័យក្មេង វឿន វ៉ា​ របស់ក្លិបបាល់ទាត់ខេត្តព្រៃវែងបានបង្ហាញក្ដីរំពឹងដ៏ធំ ក៏ដូចជាបំណងរបស់ខ្លួនចង់លេងឲ្យក្រុមជម្រើសជាតិកម្ពុជា ក្នុងព្រឹត្តិការណ៍កីឡាប្រចាំតំបន់អាស៊ាន ស៊ីហ្គេមនៅប្រទេសវៀតណាមខែក្រោយនេះ និងឆ្នាំ២០២៣ដែលកម្ពុជាយើងធ្វើជាម្ចាស់ផ្ទះ តែរូបគេមិនហ៊ានរំពឹងខ្ពស់ពេកទេ តែនឹងខំបង្ហាញអោយអស់ពីសមត្ថភាពរបស់ខ្លួន។

កីឡាករមានដើមកំណើតមកពីខេត្តព្រៃវែង វឿន វ៉ា ដែលលេងតួនាទីជាខ្សែបម្រើប្រយុទ្ធនៅក្រុមនៃខេត្តកំណើតខ្លួនដែលប្រកួតជែងនៅលីគទី២កម្ពុជា បានផ្ដល់ការសម្ភាសន៍តាមរយៈសារអេឡិចត្រូនិចមកកាន់ B8 Sport ថា៖ «សម្រាប់រដូវកាលនេះ ខ្ញុំបានត្រៀមនឹងហ្វឹកហាត់១០០%​ ក្នុងការជួយក្រុមក្នុងការប្រកួតលីគ២នេះ ដើម្បីជួយក្រុមទៅរកលទ្ធផលល្អ។  ហើយក្តីរំពឹងធំរបស់ខ្ញុំ គឺចង់ជាប់ជម្រើសជាតិនៅប្រទេសវៀតណាមនិង Sea game 2023 ដែរយើងធ្វើជាម្ចាស់ផ្ទះ ប៉ុន្តែខ្ញុំមិនរំពឹងខ្ពស់ពេកទេ ខ្ញុំនឹងខំបង្ហាញឲ្យអស់ពីសមត្ថភាពរបស់ខ្ញុំ»។

មិនតែប៉ុណ្ណោះ វឿន វ៉ា ក៏បានបង្ហាញពីស្ថានភាពល្អប្រសើររបស់ក្រុមផងដែរថា៖ «ការប្រកួត៥សប្តាហ៍នេះ ក្រោមការដឹកនាំរបស់លោកគ្រូថ្មី ខ្ញុំឃើញថាក្រុមរបស់ខ្ញុំធ្វើបានល្អច្រើន មានសាច់បាល់លេងនឹងមានឱកាសច្រើនក្នុងកាសម្រេចទីគូរប្រកួតថែមទៀតផង»។

ហើយលើសពីនេះទៅទៀតរូបគេក៏បានបង្ហាញពីកីឡាករដែលជានិមិត្តរូបរបស់ខ្លួនផងដែរថា៖ «កីឡាករក្នុងស្រុកដែលខ្ញុំយកធ្វើជានិមិត្តរូបមាន រៀមច្បងចាន់ វឌ្ឍនាកា និងកែវ សុខផេង ហើយសម្រាប់កីឡាករក្រៅស្រុកគឺខ្សែប្រយុទ្ធប្រេស៊ីល Neymar JR»៕

រូបភាព៖ ក្លិបបាល់ទាត់ខេត្តព្រៃវែង

ខ្សែប្រយុទ្ធ Karim Benzema ធ្វើបានកំណត់ត្រាដ៏ពិសេសមួយដែលមិនធ្លាប់មានកីឡាកររូបណាអាចធ្វើបានក្នុងជំនួបទល់នឹង Chelsea។

កីឡាករសញ្ជាតិបារាំងខាងលើ រកបានគ្រាប់បាល់ Hat-Trick បីគ្រាប់ម្នាក់ឯងជួយ Real Madrid យកឈ្នះ Chelsea ក្នុងលទ្ធផល ៣ទល់នឹង១ នៃការប្រកួតជើងទី១ វគ្គ៨ក្រុមចុងក្រោយ ក្របខណ្ឌ Champions League។

បើយើងងាកមកកាន់កំណត់ត្រាថ្មីរបស់ Benzema វិញ គឺ គេបានក្លាយជាកីឡាករដំបូងគេបង្អស់ដែលអាចរកបាន Hat-Trick ទល់នឹង Chelsea បានសម្រាប់ការប្រកួតក្នុងពានរង្វាន់អឺរ៉ុប ពោល មិនធ្លាប់មាននរណាម្នាក់ធ្លាប់ធ្វើបានឡើយ៕

ក្រុមបាល់​ទាត់​អគ្គិសនីកម្ពុជា​ពេល​នេះ​កំពុងតែបង្ហាញភាពភ្ញាក់ផ្អើលក្នុងពាន​រង្វាន់លីគ​ទី​២កម្ពុជា Cambodian League 2 ក្រោយ​ឈរ​កំពូលតារាង​លីគ​គិត​ត្រឹម​សប្ដាហ៍​ទី​៥ ដោយ​រក្សាលទ្ធផលឈ្នះ៤​និង​ស្មើមួយប្រកួត។ ទាក់​ទងលទ្ធផល​ល្អ​បែប​នេះ អតីតកីឡាករជម្រើស​ជាតិ​កម្ពុជា​កាល​ពី​១០​ឆ្នាំមុនបាន​និយាយ​ថា មាន​មូលហេតុជាច្រើនដែល​ធ្វើ​ឱ្យ​ក្រុមលេង​បាន​ល្អ និង​ទទួល​លទ្ធផល​បែបនេះ​៖

«អរគុណថ្នាក់​ដឹកនាំដែល​គាត់​មិន​រើសកីឡាករបរទេស​មក​ចូលរួម​ក្រុម ។យើង​ប្រើ​ប្រាស់​តែ​កីឡាករខ្មែរ និង​កីឡាករយុវជនដែលមាន​ទេពកោសល្យ បណ្ដុះបណ្ដាលពួក​គេ​ឱក្លាយជាកីឡាករអាជីពពេញលេញ ឱ្យ​ពួក​គេ​លេង​ឱ្យបាន​ច្រើន និង​ជាប់​ជម្រើស​ជាតិឱ្យបាន​ច្រើន​តាម​តែ​អាច​ធ្វើបាន។ យើងផ្ដោតលើ​ឆន្ទៈឱ្យ​គាតបាន​លេងខ្លាំង និង​បាន​ច្រើន​ប្រកួត ហើយ​សន្សំបទពិសោធន៍លើ​ទីលានឱ្យបាន​ច្រើន”។

ពេល​សួរ​អំពី​កីឡាកររូបណាល្អជាង​គេ​ក្នុងក្រុមបច្ចុប្បន្ន? ​លោក ទុំ សារ៉ាយ​គ្រូបង្គោលក្លិប​អគ្គិសនីកម្ពុជាតាម​រយៈ​សារអេឡិចត្រូនិកជាមួយអ្នក​យក​ព័ត៌មាន B8 Sport ថា៖

«ក្នុងនាមជាគ្រូបង្វឹកផ្ទាល់! ខ្ញុំមិនអាច​ឆ្លើយថា​កីឡាករ​ណា​លេចធ្លោជាង​គេ ឬ​លេង​ល្អ​ជាង​គេនោះទេ។ និយាយ​ទៅ! ខ្ញុំមិនចង់ថា បង្ហាត់​ពួក​គាត់ឱ្យ​មាន​លក្ខណៈជា Star ឬ​កីឡាករល្អបំផុត​ របស់​ក្រុម​តែ​ម្នាក់ ឬ​ពីរ​នាក់​ទេ» ។

«ខ្ញុំផ្ដោតលើ​ការ​លេង​ជាក្រុមឱ្យ​បាន​ល្អ ហើយ​ពី​មួយប្រកួត​ទៅ​មួយ​ប្រកួត ខ្ញុំបាន​ដាក់ឱ្យ​ពួក​គេ​លេង​ចល័ត​គ្រប់​ប្រកួត និង​គ្រប់ៗគ្នា។ អ្នកខ្លះលេង​នាទី​ប៉ុណ្ណេះ អ្នក​ខ្លះលេង​នារី​ប៉ុណ្ណោះ​ដោយ​ចល័តគ្នារហូត។ អញ្ចឹង​រាល់​ថ្ងៃនេះ កីឡាករទាំងអស់​លេង​បាន​សឹង​គ្រប់​គ្នា ហើយ​សមត្ថភាពប្រហាក់ប្រហែលគ្នា ពេល​អ្នក​អវត្តមាន អ្នក​នោះ​អាច​ជំនួសបាន​ដោយ​ស្មើ​ភាព​គ្នា។ បែបនេះហើយបាន​ធ្វើឱ្យពួក​គេគាត់សប្បាយចិត្តក្នុងការ​លេង ឆន្ទៈរបស់​ពួកគាត់​ប្រឹង​ប្រែងខ្លាំង ក្នុងការ​ហ្វឹកហាត់រួម​គ្នា លេង​ជាមួយគ្នារាល់ថ្ងៃ។ អញ្ចឹង​! ពួកគាត់​មិន​ដែល​គិត​ថា​ គាត់​មិន​បាន​លេង​ក្នុង​ការ​ប្រកួត​នេះ ក្នុងការ​ប្រកួត​នោះ​ទេ។ យើង​តែងតែត្រៀមរួច​ជាស្រេច ហើយ​រដូវ​កាល​នេះ​យើង​ពាន​ពាន​ច្រើន​ត្រូវប្រកួត​ប្រជែង ហើយ​យើង​បាន​ព្យាយាមឱ្យ​ពួក​គាត់​បាន​លេង​ទាំងអស់​គ្នា។ អ្នក​ខ្លះ​លេង​សម្រាប់​ពាន​លីគ អ្នក​ខ្លះពាន​ខាប់»។

លោកបាន​បន្ត​ថា​កីឡាកររបស់​លោក​មាន​៦​នាក់​ត្រូវ​បាន​គេរើស​យក​ទៅ​ចូល​រួមជម្រើស​ជាតិ​ប៉ុន្តែ​ខ្ញុំមិនដឹង​ថា​នរណា​នោះ​ទេ ហើយ​ក៏មិន​ទាន់​ដឹង​ថាក្នុងន​ចំណោម​អ្នក​ទាំង​នោះ​ ខាងគ្រូជម្រើស​ជាតិ​រើស​យក​នរណា​ដែរ៕

ក្លិបបាល់ទាត់អង្គរថាយហ្គឺរ សូមប្រកាសដំណឹងជូនថាកីឡាករសញ្ជាតិជប៉ុនពាក់ស្លាកលេខ ៨ Naoki Maeda និងក្លិបអង្គរថាយហ្គឺរ បានសម្រេចបញ្ចប់កុងត្រាដោយមានការព្រមព្រៀងពីភាគីទាំងសងខាង ដែលមានសុពលភាពចាប់ពីរដូវកាល ២០២២។

Naoki បានចូលរួមជាមួយអង្គរថាយហ្គឺរកាលពីខែ មករា ឆ្នាំ ២០២២ នេះ និងបានហ្វឹកហាត់ជាមួយក្រុមជាច្រើនសប្ដាហ៍ និងបានរួមចំណែកក្នុងការប្រកួតមិត្តភាពនានាជាច្រើនកាលពីពេលកន្លងទៅផងដែរ។ ជាអកុសល ការប្រកួទល់នឹងក្រុម បឹងកេត នៅក្នុងពានរង្វាន់មិត្តភាពមុនបើករដូវកាល Cambodia Airways Cup 2022 កាលពីថ្ងៃទី ១៦ ខែកុម្ភះ កីឡាករវ័យ ២៥ រូបនេះបានរងរបួសផ្នែកជង្គង់ធ្ងន់ធ្ងរ និងបានបញ្ជូនទៅពិនិត្យនៅមន្ទីរពេទ្យភ្លាមៗក្រោយចប់ការប្រកួត។ ថ្មីៗនេះរូបគេក៏បានទទួលបានការព្យាបាលនៅប្រទេសជប៉ុនផងដែរ។

នៅដើមខែមេសានេះ ក្លិបអង្គរថាយហ្គឺរ និងកីឡាករ Naoki Maeda បានសម្រេចព្រមព្រៀងគ្នាបញ្ចប់កុងត្រាជាផ្លូវការ ដែលនេះនឹងក្លាយជាដំណឹងដ៏សោកសៅមួយសម្រាប់ពួកយើង ក៏ដូចជាអ្នកគាំទ្រជាច្រើនដែលចង់ឃើញនិងទន្ទឹងរងចាំវត្តមានរបស់គេនៅលើទីលានក្នុងការប្រកួតផ្លូវការជាមួយក្រុម។

អត្ថបទ៖ អង្គរថាយហ្គឺរ

លទ្ធផល​ចាប់​ឆ្នោតលើ​វិញ្ញាសាបាល់ទាត់​បុរសក្នុងព្រឹត្តិការណ៍ SEA Games នៅ​វៀតណាម​បាន​ចេញ​ហើយ​ដោយ​ក្រុម​ជម្រើស​ជាតិ​កម្ពុជា​ស្ថិតក្នុង​ពូល B ជាមួយ​ថៃ ម៉ាឡេស៊ី សិង្ហបុរី និង​ឡាវ។

ដោយ​ឡែក​ក្រុមម្ចាស់​ផ្ទះ​វៀតណាម​ស្ថិត​ក្នុងពូល A ជាមួយឥណ្ឌូនេស៊ី មីយ៉ាន់ម៉ា ហ្វីលីពីន និង​ទីម័រខាងកើត។ ចំណែក​ក្រុមបាល់​ទាត់​ជម្រើស​ជាតិនារី​កម្ពុជា​ស្ថិត​ក្នុង​ពូល A ជាមួយ​ម្ចាស់​ផ្ទះ​នារីវៀតណាម ក្រុមជម្រើស​ជាតិ​នារី​ហ្វីលីពីន និង​ជម្រើស​ជាតិ​នារី​ឥណ្ឌូនេស៊ី។ ចំណែក​ពូល​ B វិញ​មាន​ថៃ មីយ៉ាន់ម៉ា ឡាវ​ និង​សិង្ហបុរី។