(English) ក្រុម Atletico Madrid បានចូលដល់យុគសម័យហិរញ្ញវត្ថុថ្មីមួយ ដោយក្រុមហ៊ុនវិនិយោគ Apollo Sports Capital (ASC) ម្ចាស់ភាគហ៊ុនភាគធំបំផុតបន្ថែមទុនជាង១ពាន់លានដុល្លារសម្រាប់អភិវឌ្ឍក្លិប។ អ្នកវិនិយោគទុនអាមេរិក ដែលជាផ្នែកមួយនៃក្រុមហ៊ុន Apollo Global Management បានទិញភាគហ៊ុនក្លិប At Madrid  ៥៥%  ក្នុងតម្លៃជាង ២,៨ពាន់លានដុល្លារ និងប្តេជ្ញាចិត្តវិនិយោគបន្ថែមជាង ១,៥ពាន់លានដុល្លារ សម្រាប់ការអភិវឌ្ឍក្លិប។

ការវិនិយោគក្នុងទំហំទឹកប្រាក់ជាង ១,៥ពាន់លានដុល្លារ គឺជាកិច្ចព្រមព្រៀងភាគហ៊ុនឯកជនដ៏ធំបំផុតមួយនៅក្នុងបាល់ទាត់អឺរ៉ុបក្នុងទសវត្សរ៍នេះ។ ASC ដឹកនាំដោយនាយកប្រតិបត្តិលោក Al Tylis មានគោលបំណងពង្រឹង និងធ្វីឲ្យក្លឹបមានស្ថិរភាពរយៈពេលវែង។Apollo Sports Capital បានវិនិយោគរួចហើយនៅក្នុង Mutua Madrid Open, Miami Open និងផ្តល់ហិរញ្ញប្បទានដល់ Nottingham ជាមួយនឹងទឹកប្រាក់ជាង ១០០លានដុល្លារ។ ការផ្តោតអារម្មណ៍របស់ពួកគេជាមួយក្លឹប Atlético គឺការពង្រីកហេដ្ឋារចនាសម្ព័ន្ធ ជាពិសេសគម្រោង Sports City ថ្មីនៅជាប់នឹងកីឡដ្ឋាន Riyadh Air Metropolitan៕

(English) យោងតាមសារព័ត៌មាន ​​Diario Sport ចេញផ្សាយកាលពីថ្ងៃអង្គារទី ១១វិច្ឆិកា ២០២៥ បានឲ្យដឹងថា ខ្សែប្រយុទ្ធប៉ូឡូញ Robert Lewandowski កំពុងពិចារណាយ៉ាងម៉ត់ចត់អំពីការចូលនិវត្តន៍ពីអាជីពបាល់ទាត់ ប្រសិនបើក្រុម Barcelona សម្រេចចិត្តអនុញ្ញាតឱ្យគាត់ចាកចេញនៅចុងបញ្ចប់នៃរដូវកាលនេះ។ ខ្សែប្រយុទ្ធប៉ូឡូញនឹងអស់សុពលភាពកិច្ចសន្យានៅរដូវក្តៅ ខណៈប្រភពខាងលើបានរាយការណ៍ថាក្លឹបBarca ទំនងជាមិនបន្តកិច្ចសន្យាថ្មីទៀតទេ។

សេចក្តីការណ៍បាននិយាយថា Lewandowski និងក្រុមគ្រួសាររបស់គាត់ស្រឡាញ់ទីក្រុង Barcelona ហើយទំនងជាមិនចាកចេញទៅលេងនៅលីគបាល់ទាត់របស់ប្រទេសអារ៉ាប៊ីសាអ៊ូឌីតនោះទេ Saudi Pro League ។ ទីភ្នាក់ងារទិញ ដូរកីឡាករ របស់អារ៉ាប៊ីសាអូឌីតបានព្យាយាមល្បួង Lewandowski ឱ្យផ្លាស់ទៅមជ្ឈិមបូព៌ាជាមួយនឹងប្រាក់ច្រើន ប៉ុន្តែកីឡាករវ័យ៣៧ឆ្នាំរូបនេះមិនខ្វល់ពីរឿងទាំងអស់នោះទេ។

Lewandowski ដែលរកបាន១០៨ គ្រាប់សម្រាប់ក្រុម Barcelona ក្នុងរយៈពេលបីឆ្នាំ អាចនឹងបញ្ចប់ការព្យួរស្បែកជើងរបស់គាត់ទីក្រុងBarcelona។Lewandowski លោតឡើងដល់លេខ២ក្នុងបញ្ជីកីឡាករ រកគ្រាប់បាល់បានច្រើនជាងគេនៅ La Liga បន្ទាប់ពីចាប់ផ្តើមបាន៤ ប្រកួត៕

(English) ចាប់តាំងពីរដូវក្តៅឆ្នាំ ២០២៤ មកទល់នឹងបច្ចុប្បន្ននេះក្លឹបបាល់ទាត់អង់គ្លេសចំនួន ៥២ នៅក្នុងលីគកំពូលទាំងបួន បានផ្លាស់ប្តូរគ្រូបង្វឹករបស់ពួកគេក្នុងចំណោមក្លឹបចំនួន ៩៤។នេះបើយោងតាមរបាយការណ៍មួយដែលត្រូវបាន គេហទំព័រ m.allfootballapp.comដកស្រង់យកមកចុះផ្សាយកាលពីថ្ងៃចន្ទទី១០វិច្ឆិកា ២០២៥។

របាយការណ៍ដដែលនោះបានបង្ហាញថា ក្នុងចំណោមក្លិបទាំង ៥២ នោះមានក្លិបចំនួន ២៣ បានផ្លាស់ប្តូរគ្រូបង្វឹករបស់ពួកគេច្រើនជាងម្តង ។ ជាឧទាហរណ៍ចុងក្រោយបំផុតគឺក្លិប Wolves បន្ទាប់ពីបណ្តេញលោក Pereira ចេញពីតំណែងក្រោយពីដឹកនាំបាន ១១ ខែ។ ក្រុម Southampton កំពុងស្ថិតក្នុងការផ្លាស់ប្តូរអ្នកចាត់ការលើកទីបីរបស់ពួកគេក្នុងរយៈពេល ១៨ ខែបន្ទាប់ពីការចាកចេញរបស់លោក Still។

ដោយផ្អែកលើទិន្នន័យប្រវត្តិសាស្ត្រសម្រាប់ការ បណ្តេញចេញតាមខែនីមួយ ក្លឹបនានាក្នុងក្របខ័ណ្ឌ Premier League ឥឡូវនេះកំពុងស្ថិតនៅលើផ្លូវបង្កើតកំណត់ត្រាថ្មីមួយសម្រាប់រដូវកាលតែមួយ ដោយមានការផ្លាស់ប្តូរគ្រូបង្វឹកលើសពីចំនួនសរុប ១៤នាក់ ក្នុងឆ្នាំ២០២២-២៣ ជាមួយនឹងការផ្លាស់ប្ដូរចំនួន ១២នាក់បន្ថែមទៀតដែលត្រូវបានព្យាករណ៍ក្នុងអត្រាបច្ចុប្បន្នចាប់ពីពេលនេះរហូតដល់ចុងបញ្ចប់នៃយុទ្ធនាការ។

ជាការកត់សម្គាល់ ខែវិច្ឆិកា និងខែធ្នូ គឺជាខែដែលពេញនិយមបំផុតសម្រាប់ការផ្លាស់ប្តូរគ្រូបង្វឹកដែលបង្ហាញថារដូវកាលបណ្តេញចេញទើបតែចាប់ផ្តើម ទោះបីជាគ្រូបង្វឹកបួននាក់ត្រូវបានបណ្តេញចេញរួចហើយនៅអាណត្តិនេះក៏ដោយ៕

(English) រដ្ឋមន្ត្រីក្រសួងយុវជន និងកីឡាឥណ្ឌូនេស៊ី លោក Erick Thohir បានស្នើឱ្យមន្ត្រីកីឡារបស់ប្រទេសនេះ មានភាពស្មោះត្រង់ និងប្រាកដនិយមបន្ថែមទៀត ក្នុងការកំណត់គោលដៅសម្រាប់ស៊ីហ្គេម ឆ្នាំ២០២៥ ដែលនឹងប្រព្រឹត្តិទៅនៅខែធ្នូ នៅប្រទេសថៃ។ គណៈកម្មការកីឡាឥណ្ឌូណេស៊ី (KOI) បានដាក់គោលដៅដំបូងដើម្បីដណ្តើមមេដាយមាសចំនួន ១២០ ប៉ុន្តែក្រសួងយុវជន និងកីឡាបាននិយាយថា ចំនួននេះគឺលើសពីសមត្ថភាពបច្ចុប្បន្នរបស់ក្រុម។ លោក Erick Thohir បានសង្កត់ធ្ងន់នៅក្នុងសន្និសីទសារព័ត៌មាននៅទីក្រុងហ្សាកាតាថា “យើងត្រូវដឹងថាយើងនៅទីណា។ យើងមិនអាចសន្យាអ្វីដែលយើងមិនអាចរក្សាបាននោះទេ។ រឿងសំខាន់គឺភាពស្មោះត្រង់ និងតម្លាភាព”។

ស៊ីហ្គេមឆ្នាំ២០២៣ នៅកម្ពុជា ឥណ្ឌូនេស៊ីដណ្ដើមបានមេដាយមាស ៨៧ គ្រឿង ឈរនៅលេខរៀងទី៣ តាមពីក្រោយប្រទេសវៀតណាម (១៣៦ មេដាយមាស) និងថៃ (១០៨ មេដាយមាស)។ ទោះបីជាវាជាហ្គេមដែលទទួលបានជោគជ័យបំផុតសម្រាប់កីឡាឥណ្ឌូនេស៊ីក្នុងរយៈពេល ៧ ឆ្នាំក៏ដោយ គម្លាតជាមួយគូប្រជែងធំទាំងពីរនៅតែសំខាន់។ ដូច្នេះ ការកំណត់គោលដៅ ៣០ ភាគរយខ្ពស់ជាងសមិទ្ធិផលពីមុនត្រូវបានចាត់ទុកថា “មិនប្រាកដនិយម” ជាពិសេសនៅពេលដែលកីឡាសំខាន់ៗជាច្រើនរបស់ប្រទេសឥណ្ឌូនេស៊ីដូចជា អត្តពលកម្ម ហែលទឹក និងវាយសី ស្ថិតក្នុងដំណាក់កាលផ្លាស់ប្តូរ។

Erick ក៏បានបញ្ជាក់ដែរថា គាត់ចង់ប្រែក្លាយស៊ីហ្គេមឆ្នាំ ២០២៥ ទៅជាជំហានត្រៀមសម្រាប់ Asian Games ឆ្នាំ ២០២៦ ជំនួសឱ្យការប្រណាំងសមិទ្ធផលរយៈពេលខ្លី។ គាត់បាននិយាយថា “ប្រសិនបើយើងកសាងភាពជោគជ័យនៅលើមូលដ្ឋានជាក់ស្តែង មេដាយនឹងមកដោយធម្មជាតិ”។

នៅក្នុងបរិបទដែលប្រទេសជាច្រើនក្នុងតំបន់មានកម្លាំងឡើងវិញ ការរំលឹករបស់លោក Erick Thohir ត្រូវបានគេមើលឃើញថាជាការដាស់តឿនទាន់ពេលវេលាថា ភាពជោគជ័យនៃកីឡាមិនអាចវាស់វែងបានដោយមេដាយមាសតែមួយមុខនោះទេ ប៉ុន្តែដោយភាពស្មោះត្រង់ និងចក្ខុវិស័យរយៈពេលវែង៕

ប្រភព៖ znews

(English) Paris Saing Germain ក្រុមគ្រងតំណែងជើងឯក UEFA Champions League កំពុងចាប់អារម្មណ៍ចង់បានខ្សែប្រយុទ្ធ Victor Osimhen របស់ក្លឹបបាល់ទាត់តួកគី Galatasaray ជាមួយនឹងរបាយការណ៍បង្ហាញថាក្លឹបនេះគ្រោងនឹងចំណាយជាង ១៨៤លានដុល្លារ។  ក្រៅពីក្លិបយក្សបារាំងនេះក៏មានក្លិបធំៗមួយចំនួនទៀតដូចជា៖ Chelsea, Manchester Utd និង Barcelona ក៏កំពុងចាប់អារម្មណ៍ចង់បានផងដែរ។ យោងតាមសារព័ត៌មានអេស្ប៉ាញ Fichajes ក្លិប PSG បានចាត់ទុក Osimhen ជាគោលដៅផ្ទេរចម្បងរបស់ពួកគេមុនពេលទីផ្សារដោះដូរកីឡាកររដូវក្តៅមកដល់។ ក្លឹបប៉ារីសនេះត្រូវបានគេនិយាយថាកំពុងស្វែងរកខ្សែប្រយុទ្ធដែលមានសមត្ថភាព ខណៈដែលអ្នកចាត់ការ Luis Enrique ត្រូវបានគេរាយការណ៍ថាទទូចលើខ្សែប្រយុទ្ធលំដាប់ពិភពលោកដែលមានសមត្ថភាពប្រែក្លាយពីការគ្រប់គ្រងបាល់ទៅជាការកគ្រាប់បាល់បញ្ចូលទី។

ក្លិប Galatasaray ដែលបានចុះហត្ថលេខាជាមួយ Osimhen ពីក្លិប Chelsea ក្នុងតម្លៃកំណត់ត្រាជាង៨០លានដុល្លារកាលពីប៉ុន្មានខែមុន ឥឡូវនេះបានដាក់តម្លៃដ៏គួរឱ្យភ្ញាក់ផ្អើលជាង ១៧០លានដុល្លារលើខ្សែប្រយុទ្ធនីហ្សេរីយ៉ាអាយុ ២៦ ឆ្នាំរូបនេះ ដែលជាតម្លៃមួយដែលអាចធ្វើឱ្យគាត់ក្លាយជាកីឡាករថ្លៃបំផុតម្នាក់ក្នុងប្រវត្តិសាស្ត្របាល់ទាត់។ លោក Dursun Ozbek ប្រធានក្លិប Galatasaray បាននិយាយថាគ្មានការចរចាណាមួយនឹងចាប់ផ្តើមក្រោម១០០លានដុល្លារនោះទេ ដោយសង្កត់ធ្ងន់លើការប្តេជ្ញាចិត្តរបស់ក្លឹបតួកគីក្នុងការរក្សាតារាឆ្នើមរបស់ពួកគេ៕

សហព័ន្ធកីទ្បាបាល់ទាត់ពិភពលោក FIFA បានដាក់ទណ្ឌកម្មលើកីឡាករក្រុមជម្រើសជាតិឥណ្ឌូនេស៊ីពីរនាក់គឺ Thom Haye និង Shayne Pattynama បន្ទាប់ពីឧប្បត្តិហេតុដែលបានកើតឡើងក្នុងអំឡុងពេលការប្រកួតជម្រុះ World Cup ឆ្នាំ ២០២៦ ជុំទី ៤ ទល់នឹងអ៊ីរ៉ាក់។ នេះបើយោងតាមការចុះផ្សាយរបស់គេហទំព័រកីទ្បា ASEANFOOTBALL។

កីឡាករទាំងពីរត្រូវបានព្យួរការប្រកួតចំនួនបួនប្រកួត និងពិន័យជាប្រាក់ CHF ៥,០០០ (៦,២០០ ដុល្លារអាម៉េរិក) ក្នុងម្នាក់ៗ ចំពោះអាកប្បកិរិយាមិនសមរម្យចំពោះអាជ្ញាកណ្តាល។ លើសពីនេះ សមាគមបាល់ទាត់ឥណ្ឌូនេស៊ី (PSSI) ត្រូវបានពិន័យជាប្រាក់ CHF ៥០,០០០ (៦២,០០០ ដុល្លារអាម៉េរិក) បន្ទាប់ពីអ្នកគាំទ្រត្រូវបានគេរកឃើញថាបានគប់វត្ថុចូលទៅក្នុងទីលានក្នុងអំឡុងពេលការប្រកួតដូចគ្នា។

FIFA បានរំលឹក PSSI អំពីការទទួលខុសត្រូវរបស់ខ្លួនក្នុងការធានាការគ្រប់គ្រងហ្វូងមនុស្ស និងវិន័យកីឡាករនៅក្នុងការប្រកួតនាពេលអនាគត៕

(English) យោងតាមការចេញផ្សាយរបស់គេហទំព័រ Transfer Market ស្តីអំពីប្រាក់ខែរបស់កីឡាករនៅលីគកំពូល អឺរ៉ុបទាំង៥កាលពីពេលថ្មីៗនេះ បានឲ្យដឹងថា ខ្សែប្រយុទ្ធ Haaland របស់ Manchester City ឈរកំពូលតារាងជាមួយនឹងប្រាក់ខែប្រចាំឆ្នាំជាង​៣៦ លានដុល្លារនាំមុខខ្សែប្រយុទ្ធ Mbappe របស់ក្លឹប Real Madrid ។

ខាងក្រោមនេះគឺជាបញ្ជីប្រាក់ខែប្រចាំឆ្នាំខ្ពស់បំផុតរបស់កីឡាករ១០រូបនៅក្នុងលីគកំពូលអឺរ៉ុបទាំង៥៖

១- Erling Haaland ក្លឹបManchester City ទទួលបានជាង ៣៧លានដុល្លារ

២-Mbappe ក្លឹបReal Madrid ទទួលបានជាង៣៦លានដុល្លារ

៣-Kane ក្លឹបBayern ទទួលបានជាង២៨លានដុល្លារ

៤- Salah ក្លឹបLiverpool ទទួលបានជាង២៧លានដុល្លារ

៥- Alabaក្លឹបReal Madrid  ទទួលបានជាង២៦លានដុល្លារ។

៦- Vlahovic ក្លឹបJuventusទទួលបានជាង២៥លានដុល្លារ

៧- Casemiroក្លឹបManchester Utd ទទួលបានជាង២៤លានដុល្លារ

៧-Van Dijk លឹបLiverpool ទទួលបានជាង២៤លានដុល្លារ

៩- Neuer ក្លឹបBayern ទទួលបានជាង២៤លានដុល្លារ

១០- Lewandowski ក្លឹប Barcelona ទទួលបានជាង២៣លានដុល្លារ៕

(English) Lamine Yamal កីឡាករវ័យក្មេង របស់Barcelona បានក្លាយជាកីឡាករវ័យក្មេងបំផុតត្រូវបានបញ្ចូលក្នុងក្រុមសហព័ន្ធកីឡាករបាល់ទាត់អាជីពអន្តរជាតិប្រចាំឆ្នាំហៅកាត់ថា FIFPRO រួមនឹងកីឡាករប្រាំនាក់ផ្សេងទៀតមកពីក្រុមដែលឈ្នះពានរង្វាន់ Champions League របស់ Paris Saint-Germain ក៏បានធ្វើការជ្រើសរើសផងដែរ។នេះបើយោងតាមការចេញផ្សាយរបស់ទីភ្នាក់ងារសារព័ត៌មាន​AP កាលពីថ្ងៃអង្គារទី ៤ វិច្ឆិកា ២០២៥។

កីឡាករ Yamal វ័យ១៨ ឆ្នាំ ជាប់ចំណាត់ថ្នាក់លេខពីរ ទទួលបានសំឡេងឆ្នោតគាំទ្រចំនួន១០១៦៧ តាមពីក្រោយអ្នកចាំទី Gianluigi Donnarumma ដែលបានផ្លាស់ពី PSG ទៅ Manchester City ទទួលបានសំឡេងឆ្នោតច្រើនជាងគេគឺចំនួន១៣៦០៩ ពីសន្លឹកឆ្នោតជាង២០០០០ ដែលត្រូវបានផ្ញើដោយកីឡាករជុំវិញពិភពលោក។

FIFPRO បានជ្រើសរើសកីឡាករឆ្នើមពិភពលោក ១១នាក់រយៈពេល២០ ឆ្នាំ ហើយកីឡាករវ័យក្មេងបំផុតមុនដែលចូលក្នុងបញ្ជីគឺ Kylian Mbappé ដែលមានអាយុ ១៩ ឆ្នាំនៅពេលដែលគាត់ត្រូវបានបោះឆ្នោតឱ្យចូលក្នុងក្រុមក្នុងឆ្នាំ២០១៨ បន្ទាប់ពីជួយបារាំងឈ្នះពានរង្វាន់បាល់ទាត់ពិភពលោក។

កីឡាករ Mbappé ត្រូវបានបញ្ចូលម្តងទៀតនៅឆ្នាំនេះជាលើកទីប្រាំមួយ ហើយត្រូវបានចូលរួមដោយមិត្តរួមក្រុម Real Madrid របស់គាត់គឺ Jude Bellingham។ ខាងក្រោមនេះគឺជាបញ្ជីឈ្មោះក្រុមកីឡាករបាល់ទាត់ពិភពលោក FIFPRO Men’s World XI Gianluigi Donnarumma (Paris Saint-Germain/Manchester City, អ៊ីតាលី); Achraf Hakimi (Paris Saint-Germain, ម៉ារ៉ុក), Virgil van Dijk (Liverpool, ហូឡង់), Nuno Mendes (Paris Saint-Germain, ព័រទុយហ្គាល់); Vitinha (Paris Saint-Germain, ព័រទុយហ្គាល់), Pedri (Barcelona, ​​អេស្ប៉ាញ), Jude Bellingham (Real Madrid, អង់គ្លេស), Cole Palmer (Chelsea, អង់គ្លេស); Lamine Yamal (Barcelona, ​​អេស្ប៉ាញ), Kylian Mbappé (Real Madrid, បារាំង), Ousmane Dembélé (Paris Saint-Germain, បារាំង)៕

(English) FIFA បាន​បញ្ជាក់​ជា​ផ្លូវ​ការ​ច្រាន​ចោល​បណ្តឹង​ឧទ្ធរណ៍​របស់​សមាគម​បាល់ទាត់​ម៉ាឡេស៊ី (FAM) ប្រឆាំង​នឹង​ការ​ចោទ​ប្រកាន់​ពី​ការ​ក្លែង​បន្លំ​លក្ខណៈ​សម្បត្តិ​របស់​កីឡាករ​បាល់ទាត់​ម៉ាឡេស៊ី ៧ នាក់​។

កីឡាករ​បាល់ទាត់​បរទេស​៧​រូប​ដែល​ឯកសារ​ត្រូវ​បាន​ក្លែង​ក្លាយ​នៅ​ម៉ាឡេស៊ី​ដើម្បី​ប្តូរ​សញ្ជាតិ​មាន​ដូច​ខាង​ក្រោម៖

– Gabriel Felipe (អេស្ប៉ាញ)

– Facundo Garces (អាហ្សង់ទីន)

– Rodrigo Holgado (អាហ្សង់ទីន)

– Imanol Machuca (អាហ្សង់ទីន)

– Joao Figueiredo (ប្រេស៊ីល)

– Jon Irazabal (អេស្ប៉ាញ)

– Hector Hevel (ហូឡង់)

លើសពីនេះ FIFA ក៏បានពិន័យសមាគមបាល់ទាត់នៃប្រទេសម៉ាឡេស៊ីចំនួន ៣៥០,០០០ ហ្វ្រង់ស្វីស (ប្រហែលជាង ៤,៥ ម៉ឹនដុល្លារ) និងហាមឃាត់កីឡាករទាំង ៧ នាក់រយៈពេល ១២ ខែ ដោយហាមមិនអោយពួកគេចូលរួមក្នុងសកម្មភាពណាមួយដែលទាក់ទងនឹងកីឡាបាល់ទាត់ និងពិន័យពួកគេចំនួន ២,០០០ ហ្វ្រង់ស្វីស (ប្រហែលជាង ២,៥ ដុល្លារផ្សេងទៀត) ៕

ប្រភព៖ Ballthai