ទីបំផុត! ស្តេចបាល់ទាត់អេហ្ស៊ីប Salah បានយល់ព្រមចុះហត្ថលេខាលើកិច្ចសន្យាថ្មីរយៈពេល២ឆ្នាំ បន្តរួមរស់ជាមួយហង្សក្រហម Liverpool រហូតដល់ឆ្នាំ២០២៧ ដោយពង្រីកទំនាក់ទំនងរបស់គាត់ជាមួយក្លិបដល់មួយទសវត្សរ៍។ ជាមួយនឹងតួលេខសំខាន់ជាច្រើននិងគុណភាពនៃគ្រាប់បាល់ស៊ុតបញ្ចូលទីបានធ្វើឱ្យ Salah ក្លាយជាកីឡាករដ៏អស្ចារ្យបំផុតម្នាក់របស់ Liverpool។

តួលេខសំខាន់ៗមួយចំនួននេះហេីយដែលបង្ហាញពីមូលហេតុឲ្យគាត់បន្តនៅទីនេះ៖

១-២៤៣ គឺជាគ្រាប់បាល់ស៊ុតបញ្ចូលទីដោយ Salah ក្នុង ៣៩៤ ប្រកួតគ្រប់ការប្រកួតទាំងអស់សម្រាប់ Liverpool ។ គាត់ជាប់ចំណាត់ថ្នាក់លេខ ៣ក្នុងបញ្ជីកីឡាកររកគ្រាប់បាល់បានច្រីនគ្រប់ពេលវេលារបស់ក្លិបតាមពីក្រោយតែ Ian Rush (៣៤៦) និង Roger Hunt  (២៨៥)។

២-១៨៤ គឺជាគ្រាប់បាល់ស៊ុតបញ្ចូលទីដោយ Salah ក្នុងក្របខណ្ឌ Premier League តាមស្មេីកំណត់ត្រា Sergio Aguero និងឈរលេខ ៥ ក្នុងបញ្ជីកីឡាកររកគ្រាប់បាល់បានច្រីនគ្រប់ពេលវេលាតាមពីក្រោយ Alan Shearer (២៦០), Harry Kane (២១៣), Wayne Rooney (២០៨) និង Andrew Cole (១៨៧) ។

៣-៥០ គឺជាចំនួនទឹកប្រាក់ ៥០ លានដុល្លារ ដែល Liverpool បង់ឱ្យ Roma ដើម្បីទិញ Salah ក្នុងឆ្នាំ២០១៧។

៤-៤៤ គឺការស៊ុតបញ្ចូលទីបាន (២៧គ្រាប់) និងជួយ assists (១៧គ្រាប់) ដោយ Salah ក្នុង Premier League មកដល់ពេលនេះ។ គាត់គឺជាអ្នកនាំមុខគេនៃប្រភេទទាំងពីរនេះ។

៥-៧ គឺជាចំនួនពានរង្វាន់សំខាន់ៗដែល Salah ឈ្នះនៅ Liverpool – Premier League មួយ (2020), Champions League មួយ (2019), FA Cup មួយ (2022), League Cup ពីរ (2022, 2024), UEFA Super Cup (2019) និង Club World Cup (2019) ៕

ប្រភព៖ AP

យោងតាមរបាយការណ៍ចំណាត់ថ្នាក់អ្នកចាំទីជុំវិញពិភពលោកដោយផ្អែកលើស្ថិតិប្រកួត ការសង្គ្រោះបាល់ការរក្សា Clean Sheets របស់ក្រុមហ៊ុន CIES Football Observatory Index ដកស្រង់យកមកចុះផ្សាយដោយកាសែតអង់គ្លេស The Sun បានឱ្យដឹងថា៖ អ្នកចាំទី Gianluigi Donnarumma របស់ក្លិប PSG ឈរចំណាត់ថ្នាក់លេខ ១ ជាមួយនឹងពិន្ទុ ៩៥,៥ លើ១០០។

ការផ្តល់ពិន្ទុរបស់ CIES ផ្អែកលើរូបមន្ត ៣ គឺកម្រិតនៃការប្រកួត LEV (Sporting Level of Matching ) លទ្ធផលប្រកួតRES (Results Points per Match) និងភាគរយនៃការសង្គ្រោះបាល់ DEV (Deviation in the percentage of save )។ សម្រាប់រដូវកាល ២០២៤-២៥ Gianluigi Donnarumma បង្ហាញវត្តមានបាន ២១ លេងបាន​ ១៨២២ នាទីសង្គ្រោះបាល់បាន ៤៩ រក្សាបាល់មិនឱ្យចូលទី(Clean Sheets) បានចំនួន ៤ ដង។ ចំណាត់ថ្នាក់លេខ ២ បានទៅកីឡាករ Yann Sommer របស់ក្លិប Inter Milan ជាមួយនឹងពិន្ទុ ៩១,៧ និងចំណាត់ថ្នាក់លេខ ៣ បានទៅ Thibaut Courtois របស់ក្លិប Real Madrid ដែលមានពិន្ទ ៨៨ ៕

នៅក្នុងយុទ្ធនាការប្រកួតក្របខណ្ឌ UEFA Champions League គិតត្រឹមវគ្គ ៨ ក្រុមចុងក្រោយជើងទី ១ ក្រុមកាំភ្លើងធំ Arsenal រកលុយបានជាង ១១៤ លានដុល្លាររួចហើយនៅរដូវកាលនេះ បន្ទាប់ពីយកឈ្នះ ៣-០ លើក្រុម Real Madrid ខណៈដែលក្រុមកំពុងស្ថិតក្នុងស្ថានភាពល្អដើម្បីឈានទៅវគ្គពាក់កណ្តាលផ្តាច់ព្រ័ត្រ។

ជាមួយនឹងការប្រកួតជើងទីពីរដ៏សំខាន់នៅ Bernabeu ខាងមុខក្រុមកាំភ្លើងធំមានឱកាសបង្កើនប្រាក់សរុបដល់ទៅលាន ១៣១ លានដុល្លារ។ ប្រសិនបើពួកគេឈានទៅវគ្គផ្តាច់ព្រ័ត្រ ប្រាក់ចំណូលរបស់ពួកគេអាចលើសពី ១៦៨ លានដុល្លារ ដែលសុទ្ធសឹងតែបានមកពីយុទ្ធនាការអឺរ៉ុបក្នុងរដូវកាលនេះ៕

ប្រភព៖ Tribuna

យោងតាមសារព័ត៌មានម៉ារ៉ុក Morocco World News ដែលត្រូវបានគេហទំព័រ Liget.com ដកស្រង់យកមកចុះផ្សាយកាលពីថ្ងៃសុក្រទី​១០ មេសា ២០២៥ បានឲ្យដឹងថា មានអគ្គីភ័យតូចមួយបានឆាបឆេះសណ្ឋាគារខ្សែប្រយុទ្ធរ៉ូណាល់ដូ  CR7 Pestana ក្នុងទីក្រុង Marrakech ប្រទេសម៉ារ៉ុក ប៉ុន្តែវាត្រូវបានគ្រប់គ្រងទាន់ពេល ពុំបណ្តាលឲ្យមានការខូចខាតធំដុំនោះទេ។ហេតុការណ៍នេះបានកើតឡើងតាំងពីថ្ងៃទី៥ មេសា មកម្លេះ។

អ្នកគ្រប់គ្រងសណ្ឋាគារបានបញ្ជាក់ថា វាជាឧបទ្ទវហេតុតិចតួច មិនបណ្តាលឲ្យមានអ្នករងរបួស និងមិនមានការជម្លៀសមនុស្សចេញនោះដែរ។ វិធានការសុវត្ថិភាពទាំងអស់ត្រូវបានអនុវត្ត ធានាសុវត្ថិភាពទាំងភ្ញៀវ និងបុគ្គលិក។ សណ្ឋាគារ​នៅ​តែ​បន្ត​ដំណើរការ​យ៉ាង​ពេញលេញ​និង​ដំណើរការ​ក្នុង​លក្ខខណ្ឌ​ធម្មតា​ទោះបី​ជា​មាន​ឧបទ្ទវហេតុ​កើតឡើង​ក៏ដោយ​។

សណ្ឋាគារ Pestana CR7 ក្នុងទីក្រុង Marrakech បានបើកដំណើរការក្នុងឆ្នាំ២០២២ គឺជាសណ្ឋាគារមួយក្នុងចំណោមសណ្ឋាគារដែលគ្រប់គ្រងដោយកីឡាករបាល់ទាត់ ដោយសហការជាមួយក្រុមសណ្ឋាគារព័រទុយហ្គាល់។ មានសាខាផ្សេងទៀតនៅទីក្រុង Lisbon និង Funchal ប្រទេសព័រទុយហ្គាល់ និងសាខាផ្សេងទៀតនៅ Madrid អេស្ប៉ាញ និងញូវយ៉ក សហរដ្ឋអាមេរិក។

យោងតាមគេហទំព័រ Celebrity Net Worth ខ្សែប្រយុទ្ធព័រទុហ្គាល់ មានតម្លៃជាង៨០០លានដុល្លារ ហើយត្រូវបានគេរំពឹងថានឹងឈានដល់ ១ពាន់លានដុល្លារមុនដំណាច់ឆ្នាំ២០២៥។ ទស្សនាវដ្ដី Forbes បានកត់សម្គាល់ថាគាត់រកបាន២៨៥លានដុល្លារក្នុងឆ្នាំ២០២៤ដែលភាគច្រើនបានមកពីប្រាក់ខែរបស់លោក Al-Nassr កំណត់ត្រាពិភពលោក៕

FIFA បានប្រកាសថាអាជ្ញាកណ្តាលនឹងត្រូវបំពាក់កាមេរ៉ានៅលើរាងកាយក្នុងអំឡុងពេលប្រកួត FIFA Club World Cup ឆ្នាំ២០២៥ ក្នុងជំហានមួយឆ្ពោះទៅរកការប្រើប្រាស់កាមេរ៉ាសម្រាប់ការផ្សាយផ្ទាល់ ក៏ដូចជាជួយបណ្តុះបណ្តាលអាជ្ញាកណ្តាលផងដែរ។

លោក Pierluigi Collina ប្រធានគណៈកម្មាធិការអាជ្ញាកណ្តាលរបស់ FIFA បាននិយាយថាវាគឺជាឱកាសដ៏ល្អមួយក្នុងការផ្តល់ជូនអ្នកទស្សនានូវបទពិសោធន៍ថ្មី ទាក់ទងនឹងរូបភាពដែលថតចេញពីមុំដែលអាចមើលបានច្បាស់ល្អដែលមិនធ្លាប់មានពីមុនមក។ Collina បានបន្តថាវាក៏ដើរតួនាទីយ៉ាងសំខាន់ក្នុងការអភិវឌ្ឍន៍អាជ្ញាកណ្តាលផងដែរ ដោយអនុញ្ញាតឱ្យគ្រូបង្វឹក និងមន្ត្រីធ្វើការវាយតម្លៃការសម្រេចចិត្តដោយមើលឃើញនូវអ្វីដែលអាជ្ញាកណ្តាលបានឃើញក្នុងអំឡុងពេលសំខាន់ៗ ។

Jarred Gillett បានក្លាយជាអាជ្ញាកណ្តាលដំបូងគេដែលពាក់ bodycam អំឡុងពេលការប្រកួត Premier League ក្នុងជ័យជម្នះ៤-០របស់ Crystal លើ Manchester United ក្នុងខែឧសភា ឆ្នាំ២០២៤។ នាយកប្រតិបត្តិសមាគមកីឡាបាល់ទាត់លោក Mark Bullingham បាននិយាយថាការប្រើប្រាស់កាមេរ៉ារាងកាយ ដើម្បីជួយការពារអាជ្ញាកណ្តាលគ្រប់កម្រិត ជាពិសេសពីការរំលោភបំពាននៅកម្រិតមូលដ្ឋាន។ ប្រសិនបើជោគជ័យ ការសាកល្បងនេះអាចត្រួសត្រាយផ្លូវសម្រាប់ការអនុវត្តកាន់តែទូលំទូលាយ រួមទាំងនៅក្នុងការប្រកួតប្រជែងដ៏ឆ្នើមដូចជា Premier League ជាដើម៕

អ្នកចាត់ការតោខៀវ Chelsea លោក Enzo Maresca បានបញ្ជាក់ថា៖ បញ្ហារបួសសរសៃពួររបស់ខ្សែការពារកណ្តាល Wesley Fofana នឹងធ្វើឱ្យអវត្តមានរហូតដល់បញ្ចប់រដូវកាលនេះ។

កាលពីថ្ងៃសៅរ៍ ក្លិបបានបញ្ជាក់ថា៖ ខ្សែការពារសញ្ជាតិបារាំងវ័យ ២៤ ឆ្នាំខាងលើ ទទួលបានការវះកាត់ជោគជ័យហើយ។ ខណៈដែល Cheslea នឹងត្រូវបាត់បង់កីទ្បាករ Fofana ហើយលោក Enzo Maresca ក៏សង្ឃឹមថាខ្សែការពារ Romeo Lavia និងខ្សែប្រយុទ្ធ Marc Guiu អាចនឹងលេងម្តងទៀត មុនពេលបញ្ចប់យុទ្ធនាការ។

យ៉ាងណា មុនការប្រកួត Europa Conference League ជើងទី ១ វគ្គ ៨ ក្រុមចុងក្រោយ ដែលត្រូវប៉ះគ្នាជាមួយនឹង Legia Warsaw លោក Enzo Maresca បាននិយាយថា៖ ជាអកុសល Wes នឹងត្រូវអវត្តមានរហូតដល់បញ្ចប់រដូវកាល៕

ចាប់តាំងពីបង្កើតពានរង្វាន់  UEFA Champions League ក្នុងឆ្នាំ១៩៥៥ មកទល់ពេលនេះមានក្លិបបាល់ទាត់ធំៗចំនួន ១០ គ្មានសំណាងឈ្នះពានរង្វាន់នេះទាល់តែសោះ តែក្លិបខ្លះធ្លាប់រងជើងឯក។

ក្លឹបទាំង១០នោះរួមមានៈ

១- Paris Saint Germain បង្កើតឡើងក្នុងឆ្នាំ ១៩៧០(ចំណាត់ថ្នាក់លេខ២ ម្តង ២០២០)

២- Atletico Madrid បង្កើតឡើងក្នុងឆ្នាំ១៩០៣(ចំណាត់ថ្នាក់លេខ២ ៣ដងគឺ១៩៧៤-២០១៤-២០១៦)

៣- Arsenalបង្កើតឡើងក្នុងឆ្នាំ ១៨៨៦(ចំណាត់ថ្នាក់លេខ២ ម្តង ២០០៦)

៤- Tottenham បង្កើតឡើងក្នុងឆ្នាំ១៨៨២(ចំណាត់ថ្នាក់លេខ២ ម្តង ២០១៩)

៥- Roma បង្កើតឡើងក្នុងឆ្នាំ១៩២៧(ចំណាត់ថ្នាក់លេខ២ ម្តង ១៩៨៤)

៦- Lyon បង្កើតឡើងក្នុងឆ្នាំ ១៩៥០(ចំណាត់ថ្នាក់លេខ២ គ្មាន)

៧- Leverkusen បង្កើតឡើងក្នុងឆ្នាំ១៩០៤(ចំណាត់ថ្នាក់លេខ២ ម្តង ២០០២)

៨- Valencia បង្កើតឡើងក្នុងឆ្នាំ ១៩១៩(ចំណាត់ថ្នាក់លេខ២ ពីរដង ២០០០-២០០១)

៩- Schalke បង្កើតឡើងក្នុងឆ្នាំ១៩០៤(ចំណាត់ថ្នាក់លេខ២ គ្មាន)

១០- Galatasaray បង្កើតឡើងក្នុងឆ្នាំ១៩០៥(ចំណាត់ថ្នាក់លេខ២ គ្មាន)

ប្រភពខាងលេីដដែលបានឲ្យដឹងថា មានតែក្រុមចំនួន២៣ប៉ុណ្ណោះដែលធ្លាប់បានឈ្នះពានរង្វាន់ Champions League អតីតពានរង្វាន់ European Cup ។ Real Madrid បានឈ្នះវាចំនួន១៥ដង ម្នាក់ឯងខណៈក្លិបមួយចំនួនឈ្នះដូចជាMilan ចំនួន៧ដង Bayern ៦ដង Liverpool ៦ដងនិងBarcelona ៥ដង។ក្រៅពីនេះភាគច្រីនឈ្នះ២ដងឬម្តង៕

អ្នកគាំទ្រ PSG និង Aston Villa បានប៉ះទង្គិចគ្នាមុនការប្រកួត Champions League វគ្គ 1/4 ផ្តាច់ព្រ័ត្រជើងទី ១ នៅទីក្រុងប៉ារីសនារាត្រីថ្ងៃពុធនេះ។  ការប្រឈមមុខដាក់គ្នាបានកើតឡើងនៅជិតកន្លែងស៊ីផឹក(បា)មួយកន្លែងដែលអ្នកគាំទ្រ Aston Villa បានប្រមូលផ្តុំ។ ក្នុង​ពេល​កើតហេតុ អ្នក​គាំទ្រ​បាន​គប់​កៅអី និង​វត្ថុ​ផ្សេង​ៗ ព្រមទាំងប្តូរកណ្តាប់ដៃដាក់​គ្នាផងដែរ ។

មុននេះ អង្គភាពប្រឆាំងអំពើជ្រុលនិយមរបស់ប្រទេសបារាំងបានព្រមានអំពីការប៉ះទង្គិចដែលអាចកើតមានទាក់ទងនឹងការប្រកួត ដោយវាយតម្លៃហានិភ័យ៣ ក្នុងចំណោម ៥។ ប៉ូលីសនឹងបង្កើនសន្តិសុខនៅស្ថានីយ៍រថភ្លើងដែលអ្នកគាំទ្រ Aston Villa កំពុងមកដល់ ហើយនឹងតាមដានចលនារបស់អ្នកគាំទ្រជុំវិញទីក្រុងប៉ារីស៕

(Khmer) អតីតខ្សែបម្រើ Chelsea និង Man United កីឡាករ Nemanja Matic បានបើកចំហរអំពីភាពខុសគ្នារវាងក្លិបទាំងពីរកំឡុងពេលគាត់លេងនៅ Premier League ។

កីឡាករវ័យ 36 ឆ្នាំបានប្រាប់ The Athletic ថា៖ “ភាពខុសគ្នាដែលខ្ញុំទទួលបាន បន្ទាប់ពី Chelsea គឺនៅ Chelsea អ្វីគ្រប់យ៉ាងគឺអំពីលទ្ធផល និងការឈ្នះពានរង្វាន់»។

«នៅទីនោះគឺជាស្មារតីនៅក្នុងក្លិបទាំងមូល សូម្បីតែអ្នកកាត់ស្មៅក៏ចង់ឈ្នះពានដែរ។ លោក Roman Abramovich គ្រាន់តែសួរយើងអំពីលទ្ធផលតែប៉ុណ្ណោះ»។

«នៅ United គេនិយាយពីគំនិតក្នុងការធ្វើជំនួញច្រើនជាង។ ខ្ញុំចាប់ផ្តើមគិត បន្ទាប់ពីចូលរួមបានពីរបីខែនៅក្នុងក្លិប»។

«ខ្ញុំបានមកដល់ United ជាមួយភាពស្រេកឃ្លានក្នុងការឈ្នះពានរង្វាន់ ដូចដែលខ្ញុំមាននៅ Chelsea ប៉ុន្តែមួយជំហានម្តងៗ ខ្ញុំចាប់ផ្តើមមានអារម្មណ៍ថាពានរង្វាន់មិនមែនជាការផ្តោតអារម្មណ៍នោះទេ»។

«ខ្ញុំយល់ថាប្រាក់ខែរបស់យើងត្រូវតែទទួលបាន ប៉ុន្តែខ្ញុំមានអារម្មណ៍ថាលទ្ធផលមិនមែនជាការផ្តោតអារម្មណ៍ដូចនៅ Chelsea ទេ។ ខ្ញុំប្រហែលជាធ្វើការងារផ្នែកពាណិជ្ជកម្មត្រឹមតែពីរនៅ Chelsea ហើយនៅ United វាច្រើនជាងនេះទៅទៀត»។

Matic បានចាកចេញពី Chelsea ទៅ Man United ក្នុងឆ្នាំ 2017 ហើយស្នាក់នៅ Old Trafford អស់រយៈពេល 5 ឆ្នាំ។ ចាប់តាំងពីពេលនោះមក រចនាសម្ព័ន្ធកម្មសិទ្ធិបានផ្លាស់ប្តូរនៅក្លិបទាំងពីរ។

នៅថ្ងៃព្រហស្បតិ៍ Matic អាចប្រឈមមុខនឹងអតីតក្លិបមួយរបស់គាត់ ខណៈដែល Lyon កំពុងជួប Man United ក្នុងក្របខ័ណ្ឌ Europa League ។