ខ្សែប្រយុទ្ធ Kylian Mbappe របស់ក្លិប Real Madrid ត្រូវបានអនុញ្ញាតឱ្យចេញពីមន្ទីរពេទ្យ បន្ទាប់ពីព្យាបាលជំងឺរលាកក្រពះ។  ប្រធានក្រុមជម្រើសជាតិបារាំងវ័យ ២៦ ឆ្នាំបានខកខានក្នុងការហ្វឹកហាត់កាលពីថ្ងៃអង្គារ ដោយគ្រុនក្តៅ និងមិនបានលេងក្នុងការប្រកួតជម្រុះ FIFA Club World Cup ដែលក្រុមស្មើគ្នាជាមួយនឹង Al-Hilal ក្នុងលទ្ធផល ១-១ កាលពីថ្ងៃពុធ។

បញ្ហាខាងលើនេះ ក្លិប Real Madrid បានប្រកាសកាលពីថ្ងៃព្រហស្បតិ៍ថា៖ Kylian Mbappe កំពុងស្ថិតនៅក្នុងមន្ទីរពេទ្យជាមួយនឹង «ជំងឺរលាកក្រពះដ៏ធ្ងន់ធ្ងរ» ប៉ុន្តែប៉ុន្មានម៉ោងក្រោយមកបានបញ្ជាក់ថារូបគេត្រូវបានអនុញ្ញាតឱ្យចេញពីមន្ទីរពេទ្យ។  Kylian Mbappe ក៏បានត្រលប់ទៅកន្លែងហ្វឹកហាត់របស់ Real Madrid នៅ Palm Beach វិញផងដែរ។

ជាមួយគ្នានេះ នៅក្នុងសេចក្តីថ្លែងការណ៍របស់ក្លិបក៏បានបញ្ជាក់ថា៖ Mbappe នឹងបន្តការព្យាបាលដោយថ្នាំជាក់លាក់ ហើយនឹងត្រលប់ទៅសកម្មភាពក្រុមវិញជាបណ្តើរៗ។ គួរជម្រាបថា សម្រាប់ការប្រកួតបន្ទាប់ Real គឺប៉ះ Pachuca នៅថ្ងៃអាទិត្យ ខាងមុខនេះ៕

ប្រភព៖ BBC

យោងតាមការ​វិភាគ​ថ្មី​មួយបានបង្ហាញ​ថា៖ ក្លិបដែលឈ្នះពានរង្វាន់ FIFA Club World Cup នឹង​ត្រូវ​បង់​ពន្ធ​ដល់​ទៅជាង ៣៤ លាន​ដុល្លារដល់​រដ្ឋាភិបាល​សហរដ្ឋ​អាមេរិក។ របាយការណ៍ខាងលើបានអះអាងថា៖ អត្រាពន្ធ ៣០% ត្រូវបានអនុវត្តចំពោះក្លឹបដែលឈ្នះពាននៅក្នុងសហរដ្ឋអាមេរិក ដែលមានន័យថាអ្នកឈ្នះនឹងត្រូវបង់ពន្ធជាង ៣៤លានដុល្លារ ពីប្រាក់រង្វាន់សរុប ១២៥លានដុល្លារ។

ក្រុមដែលឡើងដល់វគ្គចុងក្រោយនឹងបង់ប្រាក់ចំនួនជាង២២លានដុល្លារ ខណៈដែលក្រុមវគ្គពាក់កណ្តាលផ្តាច់ព្រ័ត្រនឹងចំណាយ ជាង១២លានដុល្លារ ។ ចំណែកឯវគ្គ​៨ក្រុមចុងក្រោយ​ត្រូវបង់​ពន្ធ​​ជាង ៦លានដុល្លារ។ វាក៏ត្រូវបង់ពន្ធប្រាក់ចំណូលផងដែរនៅក្នុងវគ្គចែកពូលសម្រាប់ក្លឹបដែលឈ្នះ ឬស្មើ។ អ្នកឈ្នះក្នុងការប្រកួតនឹងត្រូវបង់ពន្ធចំនួនជាង៥៦ដុល្លារ និងស្មើជាង ២៨ម៉ឺនដុល្លារ ។ សរុបមក រដ្ឋាភិបាលសហរដ្ឋអាមេរិក នឹងទទួលបានពន្ធរហូតដល់ជាង ២៥៩ លានដុល្លារពីការប្រកួតរយៈពេលមួយខែ៕

ម្ចាស់ជើងឯកលីគកំពូលថៃ ១០ សម័យកាល ក្លិប Buriram United បានប្រកាសតកុងត្រាថ្មីឱ្យប្រធានក្រុម កីទ្បាករ Narubadin Weerawatnodom ចំនួន ៣ ឆ្នាំបន្ថែមទៀត ពោលគឺកិច្ចសន្យារូបគេនៅឯកីទ្បដ្ឋាន Chang Arena រហូតដល់ឆ្នាំ ២០២៨ ឯណោះ។

ខ្សែការពារកូដស្តាំសញ្ជាតិថៃវ័យ ៣១ ឆ្នាំរូបនេះបានចូលរួមជាមួយនឹងក្លិប Buriram United ចាប់តាំងពីឆ្នាំ ២០១៥ មកម្ល៉េះ ហើយរូបគេក៏បានរួមចំណែកជួយឱ្យក្រុមឈ្នះពានរង្វាន់លីគកំពូលថៃ ៧លើក, FA Cup ៤លើក, League Cup ៥ លើក, Cup A ២លើក, Mekong Club ២លើក, Thailand Champions Cup ១លើក និង Shoppe Cup ១លើកផងដែរ។

សូមជម្រាបថា កាលពីរដូវកាលមុន Narubadin Weerawatnodom បានបង្ហាញខ្លួនសរុប ២៥ ប្រកួតគ្រប់កម្មវិធី ក៏ដូចជារកបាន ១ គ្រាប់ និងបោះបាល់ឱ្យមិត្តរួមក្រុមចំនួន ៥ លើក មុនពេលរូបគេទទួលបានកិច្ចសន្យាថ្មីបន្តស្នាក់នៅជាមួយក្រុមរយៈពេល ៣ ឆ្នាំបន្ថែមទៀត៕

ប្រភព៖ Ballthai

លោក Gennaro Gattuso ត្រូវបានតែងតាំងជាគ្រូបង្វឹករបស់ក្រុមជម្រើសជាតិអ៊ីតាលី បន្ទាប់ពីលោក Luciano Spalletti ត្រូវបានបណ្តេញចេញ កាលពីសប្តាហ៍មុន។  បុរសសញ្ជាតិអ៊ីតាលីវ័យ ៤៧ ឆ្នាំរូបនេះគឺជាអតីតខ្សែបម្រើដ៏ឆ្នើមរបស់ក្រុមជម្រើសជាតិ ដែលរួមចំណែកជួយឱ្យក្រុមឈ្នះពាន World Cup ឆ្នាំ២០០៦។ ការចូលមកកាន់តំណែងជាគ្រូបង្វឹកក្រុមជម្រើសជាតិរបស់លោក គឺជាលើកដំបូងក៏ពិតមែន ប៉ុន្តែលោក Gennaro Gattuso ក៏ធ្លាប់មានបទពិសោធន៍ជាច្រើនក្នុងដឹកនាំក្រុមធំៗដូចជា៖ AC Milan និង Napoli ។ ជាពិសេសលោក ដឹកនាំក្រុម Napoli លើកពាន Copa Italia 2019-20 ផងដែរ។

យ៉ាងណា លោក Gennaro Gattuso បានព្រមព្រៀងលើកិច្ចសន្យាដឹកនាំត្រឹមរយៈពេលតែ ១ឆ្នាំ រហូតបញ្ចប់ការប្រកួត World Cup ឆ្នាំ២០២៦ នៅសហរដ្ឋអាមេរិក កាណាដា និងម៉ិកស៊ិក។ គួរជម្រាបថា នៅក្នុងការប្រកួតប្រជែងវគ្គជម្រុះ FIFA World Cup ឆ្នាំ ២០២៦ អ៊ីតាលី ទើបរកបាន ៣ពិន្ទុប៉ុណ្ណោះ នៅក្នុងពូល I បន្ទាប់ពីការយកឈ្នះម៉ូលដាវី ២-០ ក្រោយបរាជ័យ ១ ប្រកួតដំបូងដោយចាញ់ក្រុមន័រវេល ៣-០ ក្រោមការដឹកនាំដោយលោក Luciano Spalletti ៕

ប្រភព៖ BBC

(Khmer) ក្លិប Terengganu FC នឹងប្រើប្រាស់កីឡាករកូតាបរទេសច្រើនបំផុតត្រឹម៤នាក់ដើម្បីប្រកួតប្រជែងក្នុងលីគកំពូលម៉ាឡេស៊ីរដូវកាល ២០២៥/២០២៦ ខាងមុខនេះ។

លោក Mohd Fadhli Rahmi Zulkitfli ប្រធានផ្នែកកីឡារបស់ក្លិបខាងលើបានបញ្ជាក់ថា ការសម្រេចចិត្តប្រើប្រាស់កីឡាករបរទេសតែ៤នាក់ដោយសារ បញ្ហាហិរញ្ញវត្ថុ ហើយផ្ដល់ឱកាសឱ្យកីឡាករក្នុងស្រុកបានបង្ហាញខ្លួនបានច្រើន។

លោកបានបន្តទៀតថា ក្រុមរបស់លោកមានបញ្ជីកីឡាករបរទេសដ៏មានសក្ដានុពលក្នុងបញ្ជីនាំចូលរួចហើយ ប៉ុន្តែអ្វីដែលនៅពិភាក្សានៅឡើយនោះគឺថាយកកីឡាកររូបណា ហើយតំបន់ណាក្នុងក្រុមដែលត្រូវការពង្រឹងជាចាំបាច់។

«យើងបានកាត់បន្ថយចំនួនកីឡាករបរទេសក្នុងរដូវកាលនេះដោយសារបញ្ហាហិរញ្ញវត្ថុ ដែលកីឡាករបរទេសត្រូវចំណាយច្រើន។ លើសពីនេះទៅទៀត យើងចង់ផ្ដល់ឱកាសឱ្យកីឡាករក្នុងស្រុកមានឱកាសលេង ជាជាងចំណាយលុយច្រើនលើសលប់លើកីឡាករបរទេស។»

«វាពិតជាប្រសើរជាង នៅពេលយើងចំណាយលុយយកកីឡាករក្នុងស្រុក ដែលមានសមត្ថភាពប្រហាក់ប្រហែលគ្នាជាមួយកីឡាករបរទេស។»

កាលពីរដូវកាលមុនក្រុមអណ្ដើកខ្មៅមួយនេះបញ្ចប់ចំណាត់ថ្នាក់លេខ៥ក្នុងលីគកំពូលម៉ាឡេស៊ី ដោយការប្រើប្រាស់កីឡាករបរទេស៦នាក់។ ក្នុងចំណោម៦នាក់មាននៅសល់តែកីឡាករសញ្ជាតិអ៊ូសបេគីស្ថាន Nurillo Tukhtasinov បានបន្តកុងត្រារួចហើយ ខណៈដែលកីឡាករ៥នាក់ផ្សេងទៀត ត្រូវផ្ដាច់កុងត្រាអស់ដោយសារប្រាក់ឈ្នួលខ្ពស់ពេក។

យោងតាមការស្ទង់មតិថ្មីបំផុតចុងក្រោយដែលត្រូវបានធ្វើឡើងដោយសារព័ត៌មានបារាំង L’Equipe បានរកឃើញថា កីឡាករ Ousmane Dembele ទទួលបានការគាំទ្រខ្ពស់បំផុតក្នុងការឈ្នះពានរង្វាន់ Ballon d’Or ២០២៥។ លទ្ធផលស្ទង់មតិបង្ហាញថា Ousmane Dembeleទទួលបានការគាំទ្រ ៤៤ % នាំមុខអតីតមិត្តរួមក្លឹបMbappe និងខ្សែប្រយុទ្ធវ័យក្មេង Lamine Yamal របស់ក្លឹបBarcelona ។ កាលពីសប្តាហ៍មុន Kylian Mbappeក៏ធ្លាប់ចេញសារគាំទ្រ Ousmane Dembeleដើម្បីឈ្នះ Ballon d’Or ផងដែរ។

ការទទទួលបានការគាំទ្រដ៏ច្រីនបែបនេះបន្ទាប់ពីខ្សែប្រយុទ្ធរូបនេះបានជួយឲ្យក្លឹប  PSG ឈ្នះ Champions League ជាលើកដំបូងក្នុងប្រវត្តិសាស្រ្ត។ ការស្ទង់មតិដដែលនោះក៏បានឲ្យដឹងដែរថាតារាឆ្នើម Lamine Yamal របស់ Barcelona ឈរចំណាត់ថ្នាក់លេខ២ ទទួលបានការគាំទ្រ២១ % ។ កីឡាករ​វ័យ​១៧​ឆ្នាំ​រូប​នេះ​ស៊ុតបញ្ចូលទីបាន១៨គ្រាប់និង​បានបង្ហាញទម្រង់លេង​យ៉ាង​ស្រស់​ស្អាត​ក្នុង​រដូវ​កាល​នេះ។ ចំណែកឯម្ចាស់ស្បែកជើងមាសអឺរ៉ុប Kylian Mbappe ជាប់ចំណាត់ថ្នាក់លេខ៣ ទទួលបានការគាំទ្រ ២១%ដែរ។ តារាឆ្នើមសញ្ជាតិបារាំងរូបនេះបានស៊ុតបញ្ចូលទីបានច្រើនជាង ៤០គ្រាប់ក្នុងរដូវកាលដំបូងរបស់គាត់នៅ Real Madrid ៕

ខណៈពេលដែលការប្រកួតពានរង្វាន់ Club World Cup មិនទាន់បានដំណើរការផងនោះ ស្រាប់តែមានព័ត៌មានជាច្រើនបានផ្សាយថា FIFA មានគម្រោងពង្រីកចំនួនក្លឹបចូលរួមប្រកួតពានរង្វាន់ Club World Cup បន្ថែមទៀត។ យោងតាមកាសែត The ​​Guardian ចេញផ្សាយកាលពីថ្ងៃព្រហស្បតិ៍ទី ១២ មិថុនា បានឲ្យដឹងថា FIFA នឹងធ្វើការពិគ្រោះយោបល់លើលទ្ធភាពនៃការពង្រីកការប្រកួត Club World Cup ដល់៤៨ក្រុម ដោយចាប់ផ្តើមពីការប្រកួតលើកក្រោយនៅឆ្នាំ២០២៩។

គម្រោង​នេះ​បាន​កើតឡើងបន្ទាប់​ពីមាន​ការ​បញ្ចុះ​បញ្ចូល​ដោយ​ក្លឹប​ធំៗ​នៅ​អឺរ៉ុប​ដែល​ខកខាន​ក្នុង​ការ​ប្រកួត​នៅ​រដូវ​ក្ដៅ​នេះ ដែលធ្វេីឲ្យពួកគេ​បាត់បង់ប្រាក់រង្វាន់​ដ៏​ធំ។ Barcelona, ​​Arsenal, Liverpool, Manchester United និង Milan គឺជាក្លិបធំៗមួយចំនួនដែលមិនមានលក្ខណៈសម្បត្តិគ្រប់គ្រាន់សម្រាប់ការប្រកួត Club World Cup ។ នៅឆ្នាំនេះ លីកបាល់ទាត់មួយអាចត្រូវបានតំណាងដោយក្លឹបតែពីរប៉ុណ្ណោះ។ ការពង្រីកណាមួយទំនងជាត្រូវបានប្រឆាំងដោយសហជីពកីឡាករអន្តរជាតិ Fifpro ដែលមិនសប្បាយចិត្តចំពោះការបង្កើតពានរង្វាន់នេះ ដោយសារតែពួកគេយល់ថា វាប៉ះពាល់ដល់សុខុមាលភាពរបស់កីឡាករ។

អ្នកចាត់ការទូទៅរបស់ Man City លោក Pep Guardiola បានដាក់ឈ្មោះកីឡាករចំនួន២៧នាក់សម្រាប់ទៅប្រកួតពាន Club World Cup ដែលនឹងចាប់ផ្តើមនៅទីក្រុង Miami សហរដ្ឋអាមេរិកនាថ្ងៃសៅរ៍ ប៉ុន្តែគួរឲ្យសោកស្តាយកីឡាករ Grealish មិនមានឈ្មោះក្នុងបញ្ជីទេរួមជាមួយកីឡាករអតីតប្រធានក្រុម Kyle Walker។ ខ្សែប្រយុទ្ធសញ្ជាតិអង់គ្លេសរូបនេះគឺជាកីឡាករដែលចុះហត្ថលេខាបំបែកកំណត់ត្រារបស់អង់គ្លេសនៅពេលដែលគេបានផ្ទេរមក Man City ពី Aston Villa ក្នុងតម្លៃជាង ១៣៩ លានដុល្លារក្នុងឆ្នាំ២០១២ ហើយបានបន្តជួយក្លិបឱ្យឈ្នះពានរង្វាន់ Premier League ចំនួនបី Champions League និងពានរង្វាន់ជាច្រើនទៀត។ ទោះជាយ៉ាងណាក៏ដោយពេលនេះ​គេ​មិនមែនជាតួអង្គសំខាន់ទៀតទេ ហើយ​កាល​ពី​រដូវ​កាល​មុន គេបានចូលលេងក្នុង​លីកគបាន​តែ​ប្រាំពីរ​ប្រកួត​ប៉ុណ្ណោះ​ ​។

ការអវត្តមានរបស់កីឡាករ វ័យ២៩ឆ្នាំពីការប្រកួត Club World Cup នឹងបន្ថែមការរំពឹងទុកកាន់តែខ្លាំងថាគាត់នឹងចាកចេញពីក្លិប ក្នុងអំឡុងពេលបិទរដូវកាលនេះ ស្របពេលដែលលោក Guardiola បានចាប់ផ្តើមបង្កើតក្រុមឡើងវិញបន្ទាប់ពីរដូវកាលដែលគ្មានពានរង្វាន់ជាលើកដំបូងរបស់ក្រុមក្នុងរយៈពេល៨ ឆ្នាំ។ ក្រោយពីជម្រុះកីឡាករចាស់ៗចោល ក្រុមរបស់ City បញ្ចូលកីឡាករថ្មីចំនួនបួននាក់គឺ៖ Rayan Cherki, Tijjani Reijnders, Rayan Ait-Nouri និង Marcus Bettinelli ដែលបានចុះហត្ថលេខាក្នុងពេលវេលាដើម្បីចូលរួមក្នុងការប្រកួតរយៈពេលមួយខែនៅសហរដ្ឋអាមេរិក។

ការប្រកួតដំបូងរបស់ City ក្នុងការប្រកួតដែលមានក្រុមចំនួន៣២ គឺទល់នឹង Wydad Casablanca នៅថ្ងៃពុធសប្តាហ៍ក្រោយនៅទីក្រុង Philadelphia។ ក្រុមផ្សេងទៀតក្នុងពូលគឺ Juventus និង Al Ain របស់ Abu Dhabi ៕

ការរំពឹងទុកថានឹងលក់សំបុត្រដាច់ច្រើនសម្រាប់ក្លិបបាល់ទាត់មួយចំនួនដូចជាៈ ម្ចាស់ជើងឯក Champions League ថ្មី PSG ក្លិបInter Miami ដែលប្រមូលផ្តុំដោយកំពូលតារាបាល់ទាត់ពិភពលោក ក៏ដូចជាក្លិបមហាអំណាច២មកពី Premier League គឺ Manchester City និង Chelsea ដែលចូលរួមប្រកួតពានរង្វាន់ Club World Cup នៅសហរដ្ឋអាមេរិកចុងសប្តាហ៍នេះ ​ត្រូវបានបានបរាជ័យ។

បរាជ័យក៏ដោយសារតែក្លិបទាំងនោះមិនអាចស្រូបយកបេះដូងអ្នកគាំទ្របានច្រីនដូចការរំពឹងទុក។គិតរហូតមកដល់ត្រឹមម៉ោងនេះមានតែក្លិបមួយគត់គឺ Real Madrid ដែលលក់សំបុតដាច់អស់សម្រាប់ការប្រកួតបើកដំបូងរបស់ខ្លួន។ សំបុត្រចំនួន៦៥៣២៦ សន្លឹកសម្រាប់ការប្រកួតដំបូងរបស់ Real Madrid ទល់នឹង Al Hilal នៅកីឡដ្ឋាន Hard Rock ក្នុងទីក្រុង Miami ត្រូវបានលក់អស់ជាផ្លូវការកាលពីសប្តាហ៍មុន។

តម្លៃសំបុត្រថោកបំផុតដើម្បីមើលការបង្ហាញខ្លួនលើកដំបូងក្រុមលោក Xabi Alonso មានតម្លៃជាង២៥០ដុល្លារសម្រាប់កន្លែងអង្គុយឆ្ងាយបំផុត។ Real Madrid បាន​ក្លាយ​ជា​កម្លាំង​ជំរុញ​របស់ FIFA ក្នុង​ការ​ប្រកួត​ដែលមានចំនួន ៣២ លើកដំបូងនេះ។ ការប្រកួតទីពីរក្នុងពូល F របស់ Real Madrid (ទល់នឹង Pachuca ថ្ងៃទី២២ ខែមិថុនា នៅកីឡដ្ឋាន Bank of America ក៏លក់ជិតអស់ហើយដែរ ។

ការប្រកួតបញ្ចប់វគ្គចែកពូលចុងក្រោយសម្រាប់ក្លិប Real Madrid នឹងធ្វើឡើងនៅថ្ងៃទី២៦ ខែមិថុនា នៅកីឡដ្ឋាន Lincoln Financial Field ក្នុងទីក្រុង Philadelphia ខណៈតម្លៃសំបុត្រជាង ២០០ ដុល្លារ៕