កាលពីថ្ងៃអង្គារ ទី​១៨ វិច្ឆិកា តារាបាល់ទាត់ព័រទុយហ្គាល់ Cristiano Ronaldo បានចូលរួមកិច្ចប្រជុំមួយរវាងប្រធានាធិបតីអាមេរិក Donald Trump និងព្រះអង្គម្ចាស់ Mohammed bin Salman នៃប្រទេសអារ៉ាប៊ីសាអូឌីតនៅសេតវិមាន។ លោកដូណាល់ត្រាំ បានទទួលស្វាគមន៍មេដឹកនាំអារ៉ាប៊ីសាអូឌីត ខណៈដែលមេដឹកនាំរូបនេះកំពុងស្វែងរកការស្តារឡើងវិញនូវទំនាក់ទំនងជាសកលនិងពង្រឹងទំនាក់ទំនងជាមួយទីក្រុងវ៉ាស៊ីនតោន បន្ទាប់ពីការសម្លាប់អ្នកកាសែត Jamal Khashoggi ដែលមានមូលដ្ឋាននៅសហរដ្ឋអាមេរិកក្នុងឆ្នាំ២០១៨។

លោក Trump បានថ្លែងអំណរគុណដល់Ronaldo សម្រាប់ការចូលរួម។ លោកបាននិយាយថា កូនប្រុសពៅរបស់ខ្ញុំ  Barron គឺជាអ្នកគាំទ្រដ៏ធំរបស់ Ronaldo។គាត់មានការចាប់អារម្មណ៍យ៉ាងខ្លាំងដែលបានជួបជាមួយកីឡាករបាល់ទាត់រូបនេះ។លោក Trump បាននិយាយថា «Barron បានជួបគាត់។  វាជាដំណើរទស្សនកិច្ចដ៏កម្រមួយនៅសហរដ្ឋអាមេរិកសម្រាប់ Ronaldo ដែលមិនបានលេងនៅក្នុងប្រទេសនេះចាប់តាំងពីឆ្នាំ ២០១៤។

នៅឆ្នាំ ២០១៧ ទស្សនាវដ្តីព័ត៌មានអាល្លឺម៉ង់ Der Spiegel បានរាយការណ៍ថា Ronaldo កាលពីប៉ុន្មានឆ្នាំមុនបានបង់ប្រាក់ចំនួន ៣៧៥,០០០ ដុល្លារជាប្រាក់សម្ងាត់ដល់ស្ត្រីម្នាក់ដែលបានចោទប្រកាន់គាត់ពីបទរំលោភនាងនៅសណ្ឋាគារមួយក្នុងទីក្រុង Las Vegas ក្នុងឆ្នាំ ២០០៩។ មេធាវីរបស់ Ronaldo បានអះអាងថាការរួមភេទនេះគឺជាការព្រមព្រៀងគ្នា ហើយមិនមានការចោទប្រកាន់ព្រហ្មទណ្ឌណាមួយត្រូវបានប្តឹងឡើយ។

Ronaldo ដែលរកបានជាង៩៥០គ្រាប់សម្រាប់ក្លឹប និងប្រទេស បានចុះកិច្ចសន្យាលេងឱ្យក្រុម Al-Nassr នៃលីគ Saudi Pro League រហូតដល់ឆ្នាំ២០២៧ ដែលភាគច្រើនជាកម្មសិទ្ធិរបស់មូលនិធិវិនិយោគសាធារណៈរបស់ព្រះរាជាណាចក្រ៕