សហព័ន្ធបាល់ទាត់អាហ្វ្រិក CAF បានសម្រេចពិន័យជាង ១ លានដុល្លារ និងដាក់បម្រាមប្រកួតទៅលើក្រុមជម្រើសជាតិសេណេហ្គាល់ និងម៉ារ៉ុក ដែលបានប​ង្កឱ្យមានភាព ច្របូកច្របល់ក្នុងអំឡុងពេលប្រកួតវគ្គផ្តាច់ព្រ័ត្រពានរង្វាន់អាហ្រ្វិកខាប់។ ការហាមឃាត់នេះអនុវត្តចំពោះតែការប្រកួតនៅក្នុងទ្វីបអាហ្វ្រិកប៉ុណ្ណោះ ។វាមិនប៉ះពាល់ដល់ការប្រកួតបាល់ទាត់ពិភពលោកដែលចាប់ផ្តើមនៅខែមិថុនា ដែលសេណេហ្គាល់ និងម៉ារ៉ុកសុទ្ធតែមានកៅអីប្រកួតនោះទេ។

សមាគមបាល់ទាត់សេណេហ្គាល់ ត្រូវបានពិន័យជាប្រាក់សរុបចំនួន ៦១៥ ០០០ ដុល្លារ។ ចំណែកឯ សមាគមបាល់ទាត់ម៉ារ៉ុក ក៏ត្រូវបានពិន័យជាប្រាក់ចំនួន ៣១៥,០០០ ដុល្លារ ផងដែរ។ គ្រូបង្វឹកសេណេហ្គាល់លោក Pape Thiaw ត្រូវបានពិន័យជាប្រាក់ចំនួន ១០០,០០០ ដុល្លារ និងត្រូវបានព្យួរការប្រកួតអាហ្វ្រិកចំនួនប្រាំលើក ពីបទធ្វើឱ្យការប្រកួតនេះខូចកេរ្តិ៍ឈ្មោះ។ នេះបើយោងតាមសហព័ន្ធបាល់ទាត់អាហ្វ្រិកបាននិយាយកាលពីថ្ងៃពុធ។

កីឡាករ​សេណេហ្គាល់ Iliman Ndiaye និង Ismaila Sarr ត្រូវ​បាន​ហាមឃាត់​មិន​ឲ្យ​ចូល​លេង​ក្នុង​ព្រឹត្តិការណ៍​ទ្វីបអាហ្វ្រិក​ពីរ​ប្រកួត។ ចំណែកឯ Achraf Hakimi របស់​ប្រទេស​ម៉ារ៉ុក​ត្រូវ​បាន​ហាមឃាត់​មិន​ឲ្យ​ចូល​លេង​ពីរ​ប្រកួត និង​មួយ​ប្រកួត​ត្រូវ​បាន​ព្យួរ ហើយ Ismael Saibari របស់​ប្រទេស​ម៉ារ៉ុក​ត្រូវ​បាន​ហាមឃាត់​មិន​ឲ្យ​ចូល​លេង​បី​ប្រកួត និង​ពិន័យ​ជា​ប្រាក់​ចំនួន១០ ម៉ឺនដុល្លារ​ចំពោះ​អាកប្បកិរិយា​មិន​សមរម្យ​។

គួររំឭកថា ការប្រកួតវគ្គផ្តាច់ព្រ័ត្រនៅថ្ងៃទី ១៨ ខែមករា នៅទីក្រុងរ៉ាបាត នៅពេលដែលសេណេហ្គាល់ឈ្នះ ១-០ នៅម៉ោងបន្ថែម សេណេហ្គាល់បានចាកចេញពីទីលានដើម្បីតវ៉ាក្នុងអំឡុងពេលបន្ថែមម៉ោងរយៈពេល ១៥ នាទី អ្នកគាំទ្របានព្យាយាមសម្រុកចូលទៅក្នុងទីលាន ហើយការប្រយុទ្ធបានផ្ទុះឡើងក្នុងចំណោមអ្នកកាសែតបន្ទាប់ពីនោះ៕